રશિયા અને યુક્રેનના યુદ્ધને લીધે રફ ડાયમંડના ભાવમાં 10 ટકા વધારાથી સુરતનો હીરા ઉદ્યાગ મુશ્કેલીમાં
સુરતઃ યુક્રેન અને રશિયા વચ્ચે ચાલી રહેલા યુદ્ધને લીધે ભારતના શેરબજારથી લઈને નાના ઉદ્યોગોને પણ અસર થઈ રહી છે. સુરતના ટેક્સટાઈલ, ડાયમંડ અને જ્વેલરી ઈન્ડસ્ટ્રીને પણ તેની અસર થઈ રહી છે. જો યુદ્ધ લાંબો સમય ચાલશે તો સ્થિતિ વધુ ખરાબ થશે. યુદ્ધની વિકટ પરિસ્થિતિને લીધે કાચા માલની અછતના બહાને નફાખોરી પણ શરૂ થઈ ગઈ છે. રફ હીરાની કિંમતમાં 10 ટકાનો વધારો થયો છે. તે જ સમયે, કાચા તેલના ભાવમાં વધારાને કારણે યાર્નના ભાવમાં પણ 2 થી 3 રૂપિયાનો વધારો થયો છે.
હીરાના મોટા કારખાનેદારોના કહેવા મુજબ છેલ્લા એક મહિનાથી યુક્રેન અને રશિયા વચ્ચે તણાવનું વાતાવરણ છે. એક મહિનાથી હીરા ઉદ્યોગ પર તેની અસર જોવા મળી હતી. રફ હીરા રશિયાથી આયાત કરવામાં આવે છે. હવે જ્યારે બંને દેશોમાં યુદ્ધ શરૂ થયું છે ત્યારે હીરા ઉદ્યોગકારો દ્વારા રફનો અભાવ દર્શાવીને વધુ ભાવ વસૂલવામાં આવી રહ્યા છે. છેલ્લા બે સપ્તાહથી રફ ડાયમંડની કિંમતો ઝડપથી વધી રહી છે. આ અઠવાડિયે રફ હીરામાં 10 ટકાનો વધારો થયો છે કારણ કે યુદ્ધે આંતરરાષ્ટ્રીય સ્તરે ખરીદીમાં ઘટાડો કર્યો છે. જો યુદ્ધ લાંબા સમય સુધી ચાલુ રહેશે તો રફ હીરાની કિંમતમાં વધુ વધારો થશે.
સૂત્રોના જણાવ્યા મુજબ સોનાના ભાવમાં વધારાની અસર જ્વેલરી ઉદ્યોગ પર પણ પડી છે. જેના કારણે લગ્નની ખરીદીમાં અસર થવાની સંભાવના છે. જ્વેલરી ખરીદનારાઓની સંખ્યામાં 70 ટકાનો ઘટાડો થયો છે. જો યુદ્ધ જલ્દી સમાપ્ત નહીં થાય તો તમામ ઉદ્યોગો પર મોટી અસર થવાની શક્યતા છે. સુરતના વેપારીઓ લગ્નસરાની તૈયારીઓમાં વ્યસ્ત હતા. વેપારીઓને સિઝનમાં સારી ખરીદીની અપેક્ષા હતી. આ સાથે જ વીવર્સને પણ લગ્નસરાની સિઝનમાં સારા વેપારની અપેક્ષા હતી. યુક્રેન અને રશિયા વચ્ચે યુદ્ધ શરૂ થવાને કારણે ક્રૂડ ઓઈલના ભાવમાં અચાનક વધારો થયો હતો. જેની સીધી અસર યાર્ન પર પડી છે. તેનાથી ગ્રેના ભાવમાં વધારો થવાની ધારણા છે.યુક્રેન અને રશિયા વચ્ચેના યુદ્ધની અસર આંતરરાષ્ટ્રીય બજાર પર પણ પડવા લાગી છે. ડૉલરના ભાવમાં પણ વધારો થયો છે. ક્રૂડ ઓઈલના ભાવમાં થયેલા વધારાને જોઈને યાર્ન ઉત્પાદકોએ પોલિએસ્ટર યાર્નના ભાવમાં રૂ.2 થી 3નો વધારો કર્યો છે.
હવે યુક્રેન અને રશિયા વચ્ચેના યુદ્ધને કારણે જ્વેલરીનો વ્યવસાય સંપૂર્ણપણે ઠપ થઈ ગયો છે. સુરત જ્વેલર્સ એસોસિએશનના પૂર્વ પ્રમુખે જણાવ્યું હતું કે યુદ્ધની સ્થિતિમાં સોનાની કિંમત હંમેશા વધી જાય છે. આ વખતે પણ એવું જ થયું છે. સોમવારે સોનાનો પ્રતિ તોલા ભાવ 50 હજારની નજીક હતો જે હવે 52 થી વધીને 56 હજાર થયો છે.
