અગ્નિવીરોને આસામ રાઈફલ્સ અને કેન્દ્રીય સશસ્ત્ર પોલીસ દળમાં 10 અનામત
નવી દિલ્હીઃ કેન્દ્રીય ગૃહ રાજ્ય મંત્રી નિત્યાનંદ રાયે બુધવારે રાજ્યસભામાં એક લેખિત જવાબમાં જણાવ્યું હતું કે, કેન્દ્રીય સશસ્ત્ર પોલીસ દળ (CAPF) અને આસામ રાઈફલ્સમાં કોન્સ્ટેબલ (જનરલ ડ્યુટી)/રાઈફલમેનના પદો પર નિમણૂંકોમાં અગ્નિવીરને 10 ટકા અનામત આપવામાં આવી રહી છે. ગૃહ રાજ્ય મંત્રીએ એ પણ માહિતી આપી છે કે, અગ્નિવીરોને વય મર્યાદા અને શારીરિક કસોટીમાંથી મુક્તિ આપવામાં આવી છે.
અગ્નિવીર હેઠળ ભારતીય સેના, નેવી અને એરફોર્સમાં સૈનિકોની ભરતી કરવામાં આવે છે. આ સશસ્ત્ર દળોમાં નિમણૂકની નવી શ્રેણી છે. આ અંતર્ગત 75 ટકા અગ્નિવીર ભરતી થયા, ચાર વર્ષની સેવા પછી કોઈપણ પેન્શન લાભ વિના નિવૃત્ત થશે. બાકીના 25 ટકા અગ્નિવીરોને નિયમિત સૈનિકો તરીકે દળમાં સામેલ કરવામાં આવ્યા છે. આ જ કારણ છે કે સરકારે હવે તેમાંથી 75 ટકા અગ્નિવીરો માટે પણ રોજગારની વ્યવસ્થા કરી છે.
ગૃહ રાજ્ય મંત્રી નિત્યાનંદ રાયે પણ CAPF અને આસામ રાઈફલ્સમાં ખાલી પડેલી જગ્યાઓ વિશે માહિતી આપી હતી. તેમણે કહ્યું કે, “સીએપીએફ અને આસામ રાઈફલ્સમાં 1 જુલાઈ, 2024 સુધી ખાલી જગ્યાઓની સંખ્યા 84,106 છે, બંનેમાં કુલ 10,45,751 પોસ્ટની મંજૂર સંખ્યા છે.” તેમણે વધુમાં જણાવ્યું હતું કે, “એપ્રિલ, 2023 થી ફેબ્રુઆરી, 2024 ની વચ્ચે 67,345 લોકોની ભરતી કરવામાં આવી છે. આ ઉપરાંત, 64,091 ખાલી જગ્યાઓને સૂચિત કરવામાં આવી છે અને આ જગ્યાઓ ભરતીના વિવિધ તબક્કામાં છે.”
અગ્નિવીરોને લઈને થયેલા હોબાળા વચ્ચે, ગૃહ રાજ્ય મંત્રીએ કહ્યું, “કેન્દ્રીય સશસ્ત્ર પોલીસ દળોમાં કોન્સ્ટેબલ (જનરલ ડ્યુટી)/રાઈફલમેનની પોસ્ટ પર ભરતીમાં ભૂતપૂર્વ અગ્નિવીર માટે ખાલી જગ્યાઓમાંથી 10% અનામત રાખવાનો નિર્ણય લેવામાં આવ્યો છે અને આ ઉપરાંત, આસામ રાઈફલ્સ માટે ઉચ્ચ વય મર્યાદામાં છૂટ અને શારીરિક કાર્યક્ષમતા પરીક્ષણમાંથી મુક્તિની જોગવાઈ પણ કરવામાં આવી છે.
