ભોપાલ:મધ્યપ્રદેશના કુનો-પાલપુર નેશનલ પાર્કમાં આ વર્ષના અંત સુધીમાં વધુ 12 ચિત્તા લાવવામાં આવી શકે છે.આ ચિત્તાઓને દક્ષિણ આફ્રિકાથી ભારતમાં લાવવામાં આવશે.આ માટે કુનો રાષ્ટ્રીય ઉદ્યાનમાં નવા ચિત્તાઓ માટે ખાસ બિડાણની વ્યવસ્થા કરવામાં આવી રહી છે.
મધ્યપ્રદેશના વન વિભાગના મુખ્ય સચિવ અશોક બરનવાલે જણાવ્યું હતું કે, “હાલમાં, આ સંદર્ભે દક્ષિણ આફ્રિકા અને ભારત સરકાર વચ્ચે એમઓયુ પર હસ્તાક્ષર કરવા માટે વાટાઘાટો પ્રારંભિક તબક્કામાં છે. એકવાર સમજૂતી થઈ જાય, તો અમે ચિત્તાઓને સ્થાનાંતરિત કરવાની પ્રક્રિયા શરૂ કરીશું.
કુનો-પાલપુર નેશનલ પાર્કના મુખ્ય સંરક્ષક ઉત્તમ શર્માએ જણાવ્યું હતું કે, દક્ષિણ આફ્રિકાથી લાવવામાં આવેલા 12 ચિત્તાઓ માટે ક્વોરેન્ટાઇન એન્ક્લોઝર તૈયાર કરવા માટે એક સ્થળની ઓળખ કરવામાં આવી છે.
તેમણે કહ્યું કે,અમે આ બિડાણો તૈયાર કરવા માટે સામગ્રીની પ્રાપ્તિ પણ શરૂ કરી દીધી છે. અમને નામિબિયાથી આઠ ચિત્તાઓ માટે છ ક્વોરેનટીન બિડાણ બનાવવાનો અનુભવ છે, જેના દ્વારા દક્ષિણ આફ્રિકાથી લાવવામાં આવેલા ચિત્તાઓ માટે બિડાણ તૈયાર કરવામાં અમને 15 દિવસથી ઓછો સમય લાગશે.
