ઝારખંડ વિધાનસભા ચૂંટણીમાં 2.06 કરોડ મતદારાઓ મતાધિકારનો ઉપયોગ કરશે
નવી દિલ્હીઃ ચૂંટણી પંચે ઝારખંડ વિધાનસભા ચૂંટણીની તારીખોની જાહેરાત કરી દીધી છે. અહીં 81 વિધાનસભા બેઠકો માટે બે તબક્કામાં ચૂંટણી યોજાશે. પ્રથમ તબક્કામાં 13 નવેમ્બરે અને બીજા તબક્કામાં 20 નવેમ્બરે મતદાન થશે. જ્યારે 23મી નવેમ્બરે મતગણતરી થશે.મુખ્ય ચૂંટણી કમિશનર રાજીવ કુમારે કહ્યું કે ઝારખંડમાં પ્રથમ તબક્કા માટે 18 ઓક્ટોબરે નોટિફિકેશન બહાર પાડવામાં આવશે. જ્યારે નામાંકન 25 ઓક્ટોબરથી શરૂ થશે. ઉમેદવારી પત્રોની ચકાસણી 28 ઓક્ટોબરે થશે. 30 ઓક્ટોબરે નામાંકન પરત ખેંચવામાં આવશે. જ્યારે 13 નવેમ્બરે મતદાન થશે.
બીજા તબક્કાની ચૂંટણી માટે 22 ઓક્ટોબરે જાહેરનામું બહાર પાડવામાં આવશે. નામાંકન 29 ઓક્ટોબરથી શરૂ થશે. ઉમેદવારી પત્રોની ચકાસણી 30 ઓક્ટોબરે થશે. જ્યારે 1 નવેમ્બરે નામાંકન પરત ખેંચવામાં આવશે. બીજા તબક્કાનું મતદાન 20 નવેમ્બરે થશે. પરિણામ 23 નવેમ્બરે આવશે.
મુખ્ય ચૂંટણી કમિશનરે કહ્યું કે ઝારખંડમાં કુલ મતદારો 2.06 કરોડ છે. જેમાં પુરૂષ મતદારો 1.31 કરોડ અને મહિલા મતદારો 1.29 કરોડ છે. આ સિવાય ઝારખંડમાં કુલ યુવા મતદારો 66.84 લાખ છે. જ્યારે પ્રથમ વખતના મતદારો 11.84 લાખ અને વિકલાંગ મતદારો 3.67 લાખ છે.વળી, આ સાથે 100 વર્ષથી ઉપરના મતદારો 1706 અને 85 વર્ષથી ઉપરના મતદારો 1.14 લાખ છે.
મુખ્ય ચૂંટણી કમિશનર રાજીવ કુમારે જણાવ્યું હતું કે ઝારખંડમાં ગત વખતે પાંચ તબક્કામાં મતદાન થયું હતું. આ વખતે તે બે તબક્કામાં કરવામાં આવશે. તમને જણાવી દઈએ કે હાલમાં ઝારખંડમાં ઝારખંડ મુક્તિ મોરચા, કોંગ્રેસ અને આરજેડી ગઠબંધનની સરકાર છે2019ની વિધાનસભા ચૂંટણીમાં ઝારખંડ મુક્તિ મોરચાને 30, ભાજપને 25 અને કોંગ્રેસને 16 બેઠકો મળી હતી. આ સિવાય JVMને ત્રણ, AJSUPને બે અને અન્યને પાંચ બેઠકો મળી હતી. હાલ હેમંત સોરેન ઝારખંડના મુખ્યમંત્રી છે.
(FILE: PHOTO)
