નવી દિલ્હીઃ પેરિસ ઓલિમ્પિકમાં ભાગ લેનાર 117 ભારતીય ખેલાડીઓમાં 24 સશસ્ત્ર દળોના જવાનો હશે. પેરિસ ઓલિમ્પિક 26 જુલાઈ, 2024 ના રોજ શરૂ થવાનું છે. આ 24 એથ્લેટ્સમાંથી 22 પુરૂષો છે, જેમાં સ્ટાર ભાલા ફેંકનાર સુબેદાર નીરજ ચોપરાનો સમાવેશ થાય છે, અને બે મહિલા છે, જે ઓલિમ્પિકમાં પ્રથમ વખત મહિલા સૈન્ય રમતવીરોની ભાગીદારી દર્શાવે છે.
સંરક્ષણ મંત્રાલયના જણાવ્યા અનુસાર, ટોક્યો ઓલિમ્પિક 2020 સુવર્ણ ચંદ્રક વિજેતા સુબેદાર નીરજ ચોપરા ફરી એકવાર ટોચના સન્માન માટે સ્પર્ધા કરશે કારણ કે પેરિસ ઓલિમ્પિકમાં તેની ભાગીદારી 2023 એશિયન ગેમ્સમાં હાંસલ કરેલા અસાધારણ પ્રદર્શન પર આધારિત છે, જે અંતર્ગત તેણે વર્ષ 2023 એશિયન ગેમ્સ, વર્ષ 2023 વર્લ્ડ એથ્લેટિક્સ ચેમ્પિયનશિપ, વર્ષ 2024 ડાયમંડ લીગ અને વર્ષ 2024 પાવો નુર્મી ગેમ્સમાં ગોલ્ડ મેડલ જીત્યા હતા.
કોમનવેલ્થ ગેમ્સ 2022ની કાંસ્ય ચંદ્રક વિજેતા હવાલદાર જાસ્મીન લેમ્બોરિયા અને એશિયન કુસ્તી ચેમ્પિયનશિપ 2023ની કાંસ્ય ચંદ્રક વિજેતા CPO રિતિકા હુડા એ મહિલા સેવા કર્મચારીઓ છે જેઓ પ્રથમ વખત ગેમ્સમાં ભાગ લઈ રહી છે. તે બોક્સિંગ અને રેસલિંગમાં ભાગ લેશે.
સુબેદાર અમિત પંખાલ (બોક્સિંગ); CPO તજિન્દરપાલ સિંઘ તૂર (શોટ-પુટ); સુબેદાર અવિનાશ મુકુંદ સાબલે (3000 મીટર સ્ટીપલચેઝ); CPO મુહમ્મદ અનસ યાહિયા, PO (GW) મુહમ્મદ અજમલ, સુબેદાર સંતોષ કુમાર તમિલરાસન અને JWO મિઝો ચાકો કુરિયન (4X400m મેન્સ રિલે); JWO અબ્દુલ્લા અબુબકર (ટ્રિપલ જમ્પ); સુબેદાર તરુણદીપ રાય અને સુબેદાર ધીરજ બોમ્માદેવરા (તીરંદાજી) અને નાયબ સુબેદાર સંદીપ સિંહ (શૂટીંગ) પણ લશ્કરી જવાનોમાં સામેલ છે જેઓ દેશને ગૌરવ અપાવવા સ્પર્ધામાં ભાગ લેશે.
મંત્રાલયના જણાવ્યા અનુસાર, પેરિસ ઓલિમ્પિકમાં સેવા કર્મચારીઓની સહભાગિતા રમતની ઉત્કૃષ્ટતાને પ્રોત્સાહિત કરવા અને એથ્લેટિક સંસ્કૃતિને પ્રોત્સાહન આપવા માટે સશસ્ત્ર દળોની પ્રતિબદ્ધતાને પ્રતિબિંબિત કરે છે, જે સમગ્ર દેશમાં રમતને પ્રેરણા આપે છે.