નવી દિલ્હીઃ કાયદા અને ન્યાયમંત્રી કિરેન રિજિજુએ રાજ્યસભામાં એક પ્રશ્નના લેખિત જવાબમાં માહિતી આપી હતી કે ફાસ્ટ ટ્રેક કોર્ટ (FTC)ની સ્થાપના અને તેની કામગીરી રાજ્ય સરકારોના ક્ષેત્રમાં આવે છે જેમણે તેમની જરૂરિયાતો અને સંસાધનો અનુસાર, સંબંધિત ઉચ્ચ અદાલતો સાથે પરામર્શ કરીને આવી અદાલતોની સ્થાપના કરી હતી. હાઈકોર્ટ દ્વારા આપવામાં આવેલી માહિતી મુજબ, 2017 પછી 242 વધુ ફાસ્ટ ટ્રેક કોર્ટ સેટઅપ કરવામાં આવ્યા છે 31.12.2017ના રોજ 596 ફાસ્ટ ટ્રેક કોર્ટ અસ્તિત્વમાં હતી જે 31.10.2022ના રોજ વધીને 838 થઈ ગઈ છે. દેશમાં હાલ લગભગ 413 પોસ્કો કોર્ટ કાર્યરત છે.
તેમણે વધુમાં કહ્યું હતું કે, 25.7.2019ના સુઓ મોટો 1/2019માં ફોજદારી કાયદો (સુધારા) અધિનિયમ 2018 અને સર્વોચ્ચ અદાલતના નિર્દેશને અનુસરીને કેન્દ્ર સરકારે ઓક્ટોબર, 2019માં 1023 ફાસ્ટ ટ્રેક સ્પેશિયલ કોર્ટ (એફટીએસસી)ની સ્થાપના માટે કેન્દ્ર સરકાર દ્વારા પ્રાયોજિત યોજના શરૂ કરી છે, જેમાં 31 રાજ્યો/કેન્દ્રશાસિત પ્રદેશોમાં 389 વિશિષ્ટ પોક્સો કોર્ટનો સમાવેશ થાય છે, જેમાં બળાત્કાર અને પોક્સો એક્ટ સંબંધિત કેસોની ઝડપી સુનાવણી અને નિકાલ થાય છે. શરૂઆતમાં, આ યોજના 1 વર્ષ માટે હતી જે હવે 31.03.2023 સુધી ચાલુ રાખવામાં આવી છે. હાઈકોર્ટમાંથી મળેલી માહિતી મુજબ, 28 રાજ્યો/કેન્દ્રશાસિત પ્રદેશોમાં 413 વિશિષ્ટ POCSO અદાલતો સહિત 733 FTSC કાર્યરત છે જેમણે યોજનાની શરૂઆતથી અત્યાર સુધીમાં કુલ 1,24,000થી વધુ કેસોનો નિકાલ કર્યો છે અને 31.10. 2022ના રોજ 1,93,814 કેસ પેન્ડિંગ છે.
