- દેશમાં ટેક્નોલોજીના વધતા વ્યાપ વચ્ચે સાયબર ક્રાઇમની ઘટનાઓમાં પણ વધારો
- ગુજરાતમાં મહિલાઓ પર સાયબર ક્રાઇમની ઘટનાઓમાં સતત વધારો
- ગુજરાતમાં વર્ષ 2019માં મહિલાઓ સામે 226 જેટલી સાયબર ક્રાઇમની ઘટનાઓ નોંધાઇ હતી
અમદાવાદ: દેશમાં ટેક્નોલોજીના વધતા વ્યાપ વચ્ચે સાયબર ક્રાઇમની ઘટનાઓમાં પણ સતત વધારો થઇ રહ્યો છે અને ખાસ કરીને ગુજરાતમાં મહિલાઓ પર સાયબર ક્રાઇમની ઘટનાઓમાં સતત વધારો થઇ રહ્યો છે. ગુજરાતમાં વર્ષ 2017માં મહિલાઓ પર સાયબર ક્રાઇમની 94 ઘટના હતી અને તે વર્ષ 2019માં વધીને 226 નોંધાઇ છે. આમ, બે વર્ષમાં જ મહિલાઓ પરના સાયબર ક્રાઇમની ઘટના 150 ટકા જેટલી વધી ગઇ છે. જો કે, વર્ષ 2017થી 2019 દરમિયાન મહિલાઓ પર સાયબર ક્રાઇમ બદલ એકપણ વ્યક્તિ દોષિત પુરવાર થઇ નથી.
પ્રાપ્ત વિગતો અનુસાર ગુજરાતમાં વર્ષ 2018માં મહિલાઓ પર સાયબર ક્રાઇમની 94 ઘટના નોંધાઇ હતી. આ પૈકી 59માં ચાર્જશીટ દાખલ થઇ હતી જ્યારે 83 વ્યક્તિની ધરપકડ કરવામાં આવી હતી. પરંતુ એકપણ વ્યક્તિ દોષિત પુરવાર થયા નહોતા. વર્ષ 2018માં મહિલાઓ પર સાયબર ક્રાઇમની ઘટનામાં લગભગ બે ગણો વધારો થયો હતો અને કુલ 184 કેસ નોંધાયા હતા.
આ પૈકી 113 કેસમાં ચાર્જશીટ દાખલ કરાઇ હતી અને 154 વ્યક્તિની ધરપકડ થઇ હતી. પરંતુ વર્ષ 2017ની માફક વર્ષ 2018માં પણ એકેય દોષિત પુરવાર થયા નહોતા. વર્ષ 2019માં સાયબર ક્રાઇમના 226 કેસ સામે 189માં ચાર્જશીટ દાખલ કરવામાં આવી હતી. કુલ 269 વ્યક્તિની ધરપકડ થઇ હતી. પરંતુ એકેય વ્યક્તિ દોષિત પુરવાર થયા નહોતા. સમગ્ર દેશમાં મહિલાઓ પર સાયબર ક્રાઇમની 2017માં 4242, વર્ષ 2018માં 6030 અને વર્ષ 2019માં 8379 ઘટના નોંધાઇ હતી. 3 વર્ષમાં નોંધાયેલા કુલ 18,651 કેસ સામે 131 વ્યક્તિ દોષિત પુરવાર થયા છે.
બાળકો પણ સાયબર ક્રાઇમનો ચિંતાજનક રીતે ભોગ બની રહ્યા છે. ૩ વર્ષમાં બાળકો પર સાયબર ક્રાઇમની 23 ઘટના નોંધાઇ છે. વર્ષ 2019માં ઉત્તર પ્રદેશમાં સૌથી વધુ 90 બાળકો સાયબર ક્રાઇમના ભોગ બન્યા હતા.
(સંકેત)
