- હવે લર્નિંગ લાઇસન્સ માટે RTOના ધક્કા નહીં ખાવા પડે
- જલ્દી લર્નિંગ લાઇસન્સ માટે મોબાઇલમાં જ ટેસ્ટ આપી શકશો
- ડ્રાઇવિંગ ટેસ્ટ માટેની પરીક્ષા ઑનલાઇન લેવામાં આવશે
અમદાવાદ: જો તમારે ડ્રાઇવિંગ લાઇસન્સને લગતુ કોઇ કામ હોય તો તે માટે રિજનલ ટ્રાન્સપોર્ટ ઑફિસના ધક્કા ખાવા પડે છે, પરંતુ. ઑગસ્ટથી આ ધક્કા ખાવાથી સ્વતંત્રતા મળી શકે છે. એટલે કે લર્નિંગ લાઇસન્સ માટે રિજનલ ટ્રાન્સપોર્ટ ઑફિસ કે પછી એક્ઝામિનેશન સેન્ટર જવાની જરૂર નહીં પડે. રોડ ટ્રાન્સપોર્ટ ડિપાર્ટમેન્ટ દ્વારા નક્કી કરવામાં આવ્યું છે કે ડ્રાઇવિંગ ટેસ્ટ માટેની પરીક્ષા ઑનલાઇન લેવામાં આવશે. જેમાં મોબાઇલ એપ્લિકેશન અથવા ડેસ્કટોપ કમ્પ્યુટરનો ઉપયોગ કરી શકાશે.
ડિપાર્ટમેન્ટ દ્વારા એ પણ નક્કી કરાયું છે કે, ડ્રાઇવિંગ લાઇસન્સ ટેસ્ટ સવારે 6 વાગ્યાથી રાતના 10.30 સુધી રાખવામાં આવે. સ્પેશિયલ ટ્રેક પર બે શિફ્ટમાં ડ્રાઇવિંગ ટેસ્ટ યોજવામાં આવશે.
મુખ્યમંત્રીના એડિશનલ ચીફ સેક્રેટરી મનોજ કુમાર દાસ પાસે પોર્ટ્સ અને ટ્રાન્સપોર્ટનો વધારાનો પ્રભાર છે, તેઓ જણાવે છે કે, “અમે નેશનલ ઈન્ફોર્મેટિક્સ સેન્ટર (NIC)ને જાણ કરી છે કે એવું સોફ્ટવેર તૈયાર કરવામાં આવે કે જેના આધારે અમે મોબાઈલ ફોન અને પર્સનલ કમ્પ્યુટર પર પરીક્ષા લઈ શકીએ.” RTOના અધિકારીઓએ જણાવ્યું કે, સરેરાશ રોજના અમદાવાદમાં ટુ-વ્હીલર, કાર અને હેવી વ્હીકલ્સના 450 જેટલા લાયસન્સ ઈસ્યુ કરવામાં આવે છે.
હાલ ઓનલાઈન લર્નિંગ લાઈસન્સ ટેસ્ટ માટે શહેરની ITIs અને વેસ્ટર્ન ઈન્ડિયા ઓટોમોબાઈલ એસોસિએશનના પટાંગણમાં યોજવામાં આવે છે. સરેરાશ અહીં રોજ 650થી 700 અરજીઓની ટેસ્ટ લેવામાં આવે છે, આ પહેલા તેમને RTO જવું પડતું હતું અને અહીં તેમની ટેસ્ટ લેવાયા બાદ ITIs દ્વારા તેમને અપ્રુવલ આપવામાં આવતી હતી.
હવે અરજદારો અપોઈન્ટમેન્ટ લેવાની જરુર નહીં રહે. એક વ્યક્તિ જરુરી દસ્તાવેજ અપલોડ કરી શકે છે, તેને સ્વ-પ્રમાણિત કરી શકે છે અને ઓનલાઈન પરીક્ષા આપી શકે છે. વ્યક્તિના દસ્તાવેજોની સત્યતાની તપાસ ત્યારે કરવામાં આવશે જ્યારે તેઓ અંતિમ પરીક્ષા માટે આવશે. લર્નિંગ ટેસ્ટ માટે RTOની જે ભૂમિકા છે તેને દૂર કરવામાં આવશે.
