સુરતમાં બોક્સ અને પ્લાસ્ટિંગ પેકેજિંગના ભાવમાં 15 ટકા વધારાથી વેપારીઓને થતું નુકશાન

અમદાવાદઃ રાજ્યમાં મોંઘવારી કુદકે ને ભૂસકે વધતી જાય છે. જેમાં પેટ્રોલ-ડીઝલના ભાવમાં તોતિંગ વધારો થતાં જીવન-જરૂરિયાતની ચિજ-વસ્તુઓના ભાવમાં પણ તોતિંગ વધારો થયો છે. ઉપરાંત દરેક ક્ષેત્રે ભાવમાં વધારાને લીધે વેપારીઓ પણ ચિંતિત બન્યા છે. સુરતમાં સાડી અને ડ્રેસ મટિરિયલ્સને પેક કરવા માટે ઉપયોગમાં લેવાતા બોક્સ  અને પ્લાસ્ટિકના ભાવમાં 10 થી 15 ટકાનો વધારો કરી દેવામાં આવ્યો છે. પેકેજીંગ ઈન્ડસ્ટ્રીઝમાં પણ રો મટિરિયલ્સની અછતને કારણે ભાવવધારો અમલી કરવામાં આવ્યો છે. દિવાળીનો સમય અને લગ્નસરાની સીઝન કાપડ માર્કેટ માટે ખુબ મહત્વની હોય છે. હાલ બંને મોટા તહેવારો સામે છે ત્યારે વેપારીઓને માથે એક નવી મુસીબત આવી છે. દરમિયાન  હાલ નવરાત્રી અને દિવાળીના તહેવારને પગલે બહારગામથી વેપારીઓ સાડી, ડ્રેસ મટીરીયલ્સ સહિતનું કાપડ મટીરીયલ્સ ખરીદવા માટે સુરત આવ્યા લાગ્યા છે. કોરોનાની બીજી લહેર શાંત પડતા જ સુરતના વેપારીઓને પણ ઉત્તરના રાજ્યો અને ડકશું ભારતમાંથી સારા પ્રમાણમાં ઓર્ડર મળી રહ્યા છે.

સૂત્રોના જણાવ્યા મુજબ સુરત શહેરમાંથી 300 થી વધુ ટ્રકો દ્વારા કાપડની ડિલિવરી થઇ રહી છે. તહેવારની સીઝન તેજી પકડી રહી છે. ત્યારે સાડી અને ડ્રેસ મટિરિયલ્સને પેક કરવા માટે વપરાતા બોક્સ અને પ્લાસ્ટિકના પેકેજીંગના દરમાં 10 થી 15 ટકાનો વધારો થયો છે. પેકેજીંગ ઈન્ડસ્ટ્રીઝમાં પણ રો મટિરિયલ્સની અછતને કારણે આ ઇન્ડસ્ટ્રીઝ દ્વારા 10 થી 15 ટકાનો વધારો કરવામાં આવ્યો છે. ફેડરેશન ઓફ સુરત ટેક્સ્ટાઇલના ડિરેક્ટરે જણાવ્યું હતું કે ગત વર્ષે કોરોનાના કારણે માત્ર 7 દિવસનો જ વેપાર માટે સમય મળ્યો હતો. આ વખતે કોરોનાનું સક્ર્મણ ઓછું થતા માર્કેટો રાબેતા મુજબ ચાલી રહી છે. ત્યારે પ્રોસેસિંગ ચાર્જમાં વધારો તેમજ ટ્રાન્સપોર્ટ ચાર્જ અને પેકેજીંગ ચાર્જમાં પણ વધારો થતા તેની સીધી અસર વેપારીઓના નફા પર પડી રહી છે. આમ પ્રોસેસર્સ દ્વારા જોબચાર્જનાં ભાવમાં વધારો, ટ્રાન્સપોર્ટરો દ્વારા ભાડામાં વધારા બાદ હવે સાડી ડ્રેસ મટીરીયલ્સ વગેરે પેકીંગ કરવા માટે વપરાતા બોક્સ અને વિવિધ પ્લાસ્ટિકના ભાવમાં પેકેજીંગ ઇન્ડસ્ટ્રીઝ દ્વારા લગભગ 15 ટકા સુધીનો વધારો ઝીંકવામાં આવતા વેપારીઓની સ્થિતિ તહેવારો ટાણે જ કફોડી બની ગઈ છે. કોરોના પછી માંડ માંડ ટેક્સ્ટાઇલ ઉધોગ પાટે ચડી રહ્યો છે. વેપારીઓને ઓર્ડર મળવા લાગ્યા છે. તો બીજી તરફ રો મટિરિયલ્સ, જોબ ચાર્જ, ભાડું, ટ્રાન્સપોર્ટેશન અને હવે પ્લાસ્ટિક પેકેજીંગના ભાવ વધારતા માર્કેટની હાલત કફોડી થઇ છે.