ભિલાડ નજીક ત્રણ વાહનો વચ્ચે વિચિત્ર અકસ્માતઃ 3ના મોત, 4 ઘાયલ

• અકસ્માતમાં દંપતિની નિપજ્યુ મોત
• પોલીસે કાયદેસરની કાર્યવાહી હાથ ધરી

અમદાવાદઃ ગુજરાતમાં દિવાળીના તહેવારો દરમિયાન માર્ગ અકસ્માતના બનાવોમાં વધારો થયો છે. દરમિયાન આજે વહેલી સવારે વલસાડના ભિલાડ નજીક બસ, ટ્રક અને ટેમ્પો વચ્ચે વિચિત્ર અકસ્માત સર્જાયો હતો. જેમાં ત્રણ વ્યક્તિઓના કરુણ મોત થયાં હતા. જ્યારે ચાર વ્યક્તિઓને ઈજા થતા તેમને સારવાર અર્થે હોસ્પિટલ લઈ જવાયાં હતા.

પ્રાપ્ત માહિતી અનુસાર ભિલાડ નજીક આજે વહેલી સવારે બસ, ટ્રક અને ટેમ્પો વચ્ચે ગમખ્વાર અકસ્માત સર્જાયો હતો. જેથી બસ અને ટેમ્પામાં સવાર લોકોની ચીસોથી વાતાવરણ ગમગીન બની ગયું હતું. આ અકસ્માતમાં ત્રણ વ્યક્તિઓના ઘટના સ્થળે જ કરુણ મોત થયાં હતા. જ્યારે ચાર વ્યક્તિઓને ઈજા થઈ હતી. અકસ્માતની જાણ થતા ઉચ્ચ પોલીસ અધિકારીઓ સહિતનો પોલીસ કાફલો સ્થળ પર દોડી ગયો હતો. તેમજ તમામ ઈજાગ્રસ્તોને સારવાર અર્થે હોસ્પિટલ મોકલી આપવામાં આવ્યાં હતા. ત્રણ વાહનો વચ્ચે સર્જાયેલા અકસ્માતમાં કનાડુ ગામના મુકેશભાઈ અને તેમની પત્નીનું મોત થયું હતું. પોલીસે ત્રણેય મૃતદેહને પીએમ અર્થે હોસ્પિટલ મોકલી આપ્યાં હતા. આ બનાવ અંગે પોલીસે ગુનો નોંધવાની કવાયત શરૂ કરી હતી. બીજી તરફ માર્ગ અકસ્માતમાં દંપતિ સહિત 3ના મોત થતા સમગ્ર વિસ્તારમાં શોકનું મોજુ ફરી વળ્યું છે.