- હિજાબ મુદ્દે કર્ણાટક હાઈકોર્ટ ચુકાદો સંભળાવશે
- રાજ્યમાં પોલીસ અને તંત્ર એલર્ટ પર
- કેટલાક પ્રતિબંધો પણ લાગુ કરવામાં આવ્યા
કર્ણાટક :ઉડુપીમાં પ્રિ-યુનિવર્સિટી કોલેજની ગર્લ સ્ટુડન્ટ્સના એક જૂથે, તેમના વર્ગોમાં હિજાબ પહેરવાની છૂટ આપવાની માગણી કરી, જ્યારે કેટલાક હિંદુ વિદ્યાર્થીઓ કેસરી શાલ પહેરીને આવ્યા ત્યારે વિવાદ થયો. આ મુદ્દો દેશના દરેક રાજ્યમાં ચર્ચાનો વિષય બન્યો હતો, ત્યારે હવે કર્ણાટક હાઈકોર્ટની સંપૂર્ણ બેંચ, જેણે હિજાબ કેસમાં સુનાવણી પૂર્ણ કરી છે, મંગળવારે લગભગ 10:30 વાગ્યે તેનો ચુકાદો સંભળાવશે.
જાણકારી અનુસાર નિર્ણય પહેલા, બેંગલુરુમાં 21 માર્ચ સુધી જાહેર સ્થળોએ તમામ પ્રકારના મેળાવડા, આંદોલન, વિરોધ પ્રદર્શન અથવા ઉજવણી પર પ્રતિબંધ મૂકવામાં આવ્યો છે. જ્યારે રાજ્યના અનેક જિલ્લાઓમાં કલમ 144 પણ લાગુ કરવામાં આવી છે.
KSRPની 8 કંપનીઓ, ડિસ્ટ્રિક્ટ આર્મ્ડ રિઝર્વની 6 કંપનીઓ, RAFની 1 કંપની અહીં તૈનાત કરવામાં આવી છે. ઉડુપી જિલ્લામાં પણ આવા જ પ્રતિબંધો જાહેર કરવામાં આવ્યા છે. ઉડુપી જિલ્લા મેજિસ્ટ્રેટ કુરમા રાવ એમએ જણાવ્યું હતું કે આવતીકાલે ઉડુપીમાં તમામ શાળાઓ અને કોલેજો બંધ રહેશે.
બેંગલુરુ પોલીસ કમિશનર કમલ પંતે માહિતી આપી છે કે 15 માર્ચથી 21 માર્ચ સુધી એટલે કે આખા અઠવાડિયા માટે બેંગલુરુમાં જાહેર સ્થળોએ તમામ પ્રકારના મેળાવડા, આંદોલન, વિરોધ પ્રદર્શન અને ઉજવણી પર પ્રતિબંધ રહેશે. જણાવી દઈએ કે અગાઉ 8 માર્ચ સુધી બે અઠવાડિયા માટે પ્રતિબંધિત આદેશો લાદવામાં આવ્યા હતા. આદેશ અનુસાર, બેંગલુરુમાં શૈક્ષણિક સંસ્થાઓના 200 મીટરની અંદર કોઈપણ પ્રકારના મેળાવડા, આંદોલન, વિરોધ અથવા શાંતિને ખલેલ પહોંચાડતી અન્ય પ્રવૃત્તિઓ પર પ્રતિબંધ રહેશે.
