ફરી એકવાર કોરોનાના કેસમાં તેજી:ઉત્તરપ્રદેશના ગૌતમ બુદ્ધ નગર જિલ્લામાં એક દિવસમાં 103 નવા કેસ નોંધાયા

• ફરી એકવાર કોરોનાના કેસમાં તેજી
• ગૌતમ બુદ્ધ નગરમાં કોરોનાનો પગપેસારો
• જિલ્લામાં 103 દર્દીઓ મળ્યા,18 બાળકો પણ સંક્રમિત

લખનઉ:દેશ સહિત ઘણા રાજ્યોમાં ફરી એકવાર કોરોનાના કેસમાં તેજી જોવા મળી રહી છે.ઉત્તર પ્રદેશના ગૌતમ બુદ્ધ નગર જિલ્લામાં એક દિવસમાં કોરોના વાયરસ સંક્રમણના 103 નવા કેસ નોંધાયા છે.આરોગ્ય વિભાગ દ્વારા બુધવારે જાહેર કરવામાં આવેલા રિપોર્ટમાં આ માહિતી આપવામાં આવી છે.

રિપોર્ટ અનુસાર, છેલ્લા 24 કલાકમાં જે 103 દર્દીઓમાં સંક્રમણની પુષ્ટિ થઈ છે,તેમાં 18 બાળકો પણ સામેલ છે.તો આ સમયગાળા દરમિયાન 47 દર્દીઓ ચેપ મુક્ત થયા. રિપોર્ટ અનુસાર, ગૌતમ બુદ્ધ નગરમાં કોરોના વાયરસ સંક્રમણના સક્રિય કેસની સંખ્યા વધીને 467 થઈ ગઈ છે.જિલ્લામાં અત્યાર સુધીમાં 99,257 લોકો કોરોના વાયરસના ચેપથી પ્રભાવિત થયા છે,જેમાંથી 98,300 દર્દીઓ સ્વસ્થ થયા છે. ગૌતમ બુદ્ધ નગરમાં કોવિડ-19 સંક્રમણને કારણે અત્યાર સુધીમાં કુલ 490 લોકોના મોત થયા છે.

ઘણા રાજ્યોમાં દરરોજ દર્દીઓની સંખ્યા ફરી એકવાર વધી રહી છે. જેના કારણે કેન્દ્ર સરકાર ઘણી સાવધ બની ગઈ છે.કેન્દ્રીય સ્વાસ્થ્ય સચિવ રાજેશ ભૂષણે બીજી વખત પત્ર મોકલીને ઉત્તર પ્રદેશ સહિત પાંચ રાજ્યોને એલર્ટ કર્યા છે.પાંચ દિવસ પહેલા રાજેશ ભૂષણ દ્વારા પણ આવો જ પત્ર રાજ્યોને લખવામાં આવ્યો હતો.પરંતુ મામલાની ગંભીરતાને જોતા તેમણે ફરી એકવાર આ રાજ્યોને એલર્ટ કર્યા છે. કેન્દ્રીય સ્વાસ્થ્ય સચિવ રાજેશ ભૂષણે મંગળવારે પત્ર લખીને હરિયાણા, દિલ્હી, મહારાષ્ટ્ર, ઉત્તર પ્રદેશ અને મિઝોરમને એલર્ટ કર્યા છે.આ પાંચ રાજ્યોમાં કોવિડ પોઝીટીવીટી રેટ વધી રહ્યો છે.