અમદાવાદ એરપોર્ટને સર્વશ્રેષ્ઠ એરપોર્ટનું સન્માન મળ્યું
- અમદાવાદ એરપોર્ટની વધુ એક સિદ્ધિ
- સર્વશ્રેષ્ઠ એરપોર્ટનો મળ્યો એવોર્ડ
- મુસાફરોને મળી રહ્યો છે શ્રેષ્ઠ અનુભવ
અમદાવાદ: અમદાવાદ શહેરમાં આવેલા એરપોર્ટને વધુ એક સિદ્ધિ પ્રાપ્ત થઈ છે. અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર દિવસેને દિવસે પ્રવાસીઓની સંખ્યા વધી રહી છે ત્યારે એવોર્ડ મળતા તેની પ્રતિષ્ઠામાં વધુ એક સન્માન ઉમેરાયું છે. આ વર્ષે અમદાવાદના ગૌરવ સમા સરદાર વલ્લભભાઈ પટેલ ઈન્ટરનેશનલ એરપોર્ટ સહિત 4 એરપોર્ટને એક્રેડીશન એનાયત કરવામાં આવ્યું છે.
સરદાર વલ્લભભાઈ પટેલ ઈન્ટરનેશનલ એરપોર્ટે ગ્રાહકોની સેવામાં સતત ઉત્કૃષ્ટતા પ્રદાન કરી પાછલા પાંચ વર્ષોમાં અનેકવિધ ASQ એવોર્ડ્સ જીત્યા છે. SVPI એરપોર્ટ 2021માં વિશ્વભરમાં સન્માન મેળવનારા ચાર એરપોર્ટસ પૈકીનું એક હતું.
SVPI એરપોર્ટે મુસાફરોના શ્રેષ્ઠ અનુભવ અને સરળ પ્રક્રિયાની ખાતરી માટે અનેકવિધ નવી સુવિધાઓ અમલ કરી છે. જેમાં એક જ વર્ષમાં વિવિધ રિટેલ અને ફૂડ કાઉન્ટર્સની સંખ્યા બમણી કરવી, મુસાફરોને વધુ સારા વિકલ્પો પ્રદાન કરવા, ડેસ્ક ઓફ ગુડનેસ અને ઈ-ગેટ્સ જેવી ટેક્નોલોજીથી મુસાફરોની સુવિધાઓ વધારવા જેવી અનેક બાબતોનો સમાવેશ થાય છે.
મુસાફરોના અનુભવ સુધારવાના સતત પ્રયાસોના આધારે એરપોર્ટ કાઉન્સિલ ઈન્ટરનેશનલ (ACI)ના ડાયરેક્ટર જનરલે રોલ ઓફ એક્સેલન્સ 2021માં સામેલ થવાની જાહેરાત કરી હતી. એરપોર્ટને સતત મળતું સન્માન દર્શાવે છે કે ગ્રાહકો તેના કેન્દ્ર સ્થાને છે. SVPI એરપોર્ટ અવનવા સુધારા, વિકાસ અને મુસાફરોના વધુ સારા અનુભવોની યાત્રા ચાલુ રાખવા સતત પ્રયત્નરત છે.
સિટી એરપોર્ટ ટીમ્સ મુસાફરોને વધુ સારી સેવાઓ આપવા માટેની તકો ઝડપી રહી છે. અવલોકન અને મુસાફરોની જરૂરિયાતોના આધારે, છેલ્લા એક વર્ષમાં એરપોર્ટ પર સંખ્યાબંધ ફેરફારો કરવામાં આવ્યા છે. તાજેતરમાં ખાસ એપ્લિકેશન-આધારિત ટેક્સી પાર્કિંગ, પ્રીપેડ ટેક્સી પાર્કિંગ અને ઓટો રિક્ષા પાર્કિંગ સાથે જોડાયેલા પીક અપ અને ડ્રોપ પોઈન્ટ્સ પણ બનાવવામાં આવ્યા છે.
