ગાંધીનગર: રાજ્યમાં રખડતા ઢોરોના ત્રાસ સામે ગુજરાત હાઈકોર્ટે આકરું વલણ અપનાવ્યા બાદ રાજ્યના નાના-મોટા શહેરોમાં રખડતા અને જાહેર રોડ પર અડ્ડો જમાવીને બેઠેલા ઢોર પકડવાની ઝૂંબેશ શરૂ કરવામાં આવી છે. ત્યારે, ઢોર પકડવાની કામગીરી કરતા કર્મચારીઓ અને પશુઓના માલિકો વચ્ચેની સાંઠગાંઠની સાબિતી આપતી ઘટના સામે આવી છે. ગાંધીનગર મ્યુનિ.કોર્પોરેશનના બે કોન્ટ્રાક્ટ કર્મચારીઓની રખડતા ઢોર નહીં પકડવા માટે લાંચ માગવાના આરોપસર ધરપકડ કરવામાં આવી હતી.
સૂત્રોના જણાવ્યા મુજબ એન્ટી કરપ્શન બ્યુરો (ACB)એ ગોઠવેલા છટકામાં ગાંધીનગર મહાનગર પાલિકાના કોન્ટ્રાક્ટ પર કામ કરતા બે કર્મચારીઓ 15 હજારની લાંચ લેતા ઝડપાઈ ગયા હતા. એનિમલ કેચર મનોજકુમાર ઉર્ફે બબલુ ઠાકોર અને ડ્રાઈવર બન્ટી વાઘેલાને 15 હજારની લાંચ લેતા ઝડપી લેવાયા હતા. એક પશુપાલકે એસીબીને કરેલી ફરિયાદમાં જણાવ્યું હતું કે, ગાંધીનગર ખાતે તે અને અન્ય ચાર લોકો પશુપાલનનો વ્યવસાય કરે છે. ઢોર પકડવાની કામગીરી કરતા ગાંધીનગર મનપાના કોન્ટ્રાક્ટ પરના આ બે કર્મચારીઓ રખડતા પશુઓ પકડવા માટે ગાડી લઈને નીકળે તે પહેલા અગાઉથી જાણ કરવા માટે પશુપાલક દીઠ 3 હજાર રૂપિયા એમ પાંચ પશુપાલકોના કુલ 15 હજાર રૂપિયા માગ્યા હતા. આ ફરિયાદના આધારે એસીબીએ આ કર્મચારીઓને પકડવા માટે છટકું ગોઠવ્યું હતું અને બંનેને લાંચ લેતા રંગેહાથ ઝડપી લીધા હતા.
અત્રે ઉલ્લેખનીય છે કે, રખડતા પશુઓ મામલે હાઈકોર્ટે આકરું વલણ અપનાવતા રાજ્ય સરકારનો ઉધડો લીધો હતો અને કહ્યું હતું કે, જો તમારાથી ન થઈ શકતું હોય તો પછી હાઈકોર્ટે પગલાં લેવા પડશે. હાઈકોર્ટના આકરા વલણને જોતાં રાજ્ય સરકારે બુધવારે નિર્ણય કર્યો હતો કે, બધી મહાનગરપાલિકા અને નગરપાલિકાઓમાં ઢોરવાડા બનાવાશે અને તેમાં જે પશુપાલકો પાસે તેમના પશુઓ મૂકવાની જગ્યા ન હોય તે પોતાના પશુઓ મફતમાં મૂકી શકશે. આ ઉપરાંત રાજ્ય સરકારે પશુઓના ટ્રાન્સપોર્ટેશનનો ખર્ચ આપવાની પણ વાત કરી હતી. સાથે જ રાજ્ય સરકારે હાઈકોર્ટને ખાતરી આપી હતી કે, અમદાવાદના રસ્તાઓ પરથી સોમવાર સુધીમાં રખડતા પશુઓ દૂર કરી દેવાશે. રાજ્ય સરકારે જણાવ્યું હતું કે, કે રખડતા પશુઓ પકડાશે તો તેના માલિક સામે તાત્કાલિક એફઆઈઆર નોંધવામાં આવશે.
