વડોદરા : વાઘોડિયાના ધારાસભ્ય અને બાહુબળી ગણાતા મધુ શ્રીવાસ્તવને ભાજપે આ વખતે ટિકિટ ન આપતા તેઓ બળવો કરીને અપક્ષ તરીકે ઊભા રહ્યા છે. મધુ શ્રીવાસ્તવ કોઈની યે પણ શેહ શરમ રાખ્યા વિના નિવેદનો કરવા માટે કાયમ બિન્દાસ્ત રહેતા હોય છે. તાજેતરમાં તેમણે એવું નિવેદન આપ્યુ હતું કે, મારા કાર્યકર્તાનો કોઈ કોલર પણ પકડશે તો ગું તેના ઘરમાં જઈને ગોળી મારી દઈશ. મધુ શ્રીવાસ્તવના આ નિવેદન સામે ચૂંટણી પંચે સુઓમોટા દાખલ કરીને જિલ્લા કલેકટર પાસે અહેવાલ માંગતા મધુ શ્રી વાસ્તવ વધુ છંછેડાયા છે. અને તેમણે સરકારને ખૂલ્લો પડકાર ફેંક્યો હતો કે, તમારે ઈડી કે આટી જે મોકલવું હોય તે મોકલો પણ કોઈનાથી ડરવાનો નથી.
સૂત્રોના જણાવ્યા મુજબ બળવાખોર નેતા મધુ શ્રીવાસ્તના ફરી તીખાં તેવર જોવા મળ્યાં છે. ગોળી મારવાના નિવેદન બાદ તેમણે ફરીથી પડકાર ફેંક્યો છે. તેમના ગોળી મારવાના વિવાદિત નિવેદન પર ચૂંટણી પંચે સુઓમોટો લેતાં મધુ શ્રીવાસ્તવ વિફર્યાં હતા. તેમણે ફરીથી કહ્યું કે, ED-IT જે મોકલવું હોય તે મોકલવાની છૂટ. આ મધુ શ્રીવાસ્તવ છે કોઈનાથી ડરવાનો નથી. અપક્ષ ચૂંટણી લડનારને રાષ્ટ્રીય પાર્ટી હેરાન કરે છે. મધુ શ્રીવાસ્તવના ગોળી મારવાના નિવેદન પર ચૂંટણી પંચે સુઓમોટો લઈ મામલાનો અહેવાલ મંગાવ્યો છે. વડોદરા જિલ્લા ચૂંટણી અધિકારી અને કલેક્ટર એબી ગોરે કહ્યું કે, ચૂંટણી પંચને ઇન્ટરીમ અહેવાલ મોકલી આપ્યો છે. ચૂંટણી પંચ હજી વધુ વિસ્તૃત અહેવાલ માંગશે તો ફરી મોકલી આપીશું.
સૂત્રોએ ઉમેર્યું હતું કે, તાજેતરમાં વાઘોડિયાના ધારાસભ્ય અને અપક્ષ ઉમેદવાર મધુ શ્રીવાસ્તવનું વિવાદિત નિવેદન આપ્યુ હતું. ફોર્મ ભરતા સમયે રેલી કાઢતા સમયે કહ્યું હતું કે, મારા કાર્યકરને કોઈનાથી ડરવાની જરૂર નથી, હું હજી પણ બાહુબલી છું. મારા કાર્યકરની કોઈ કોલર પકડશે તો ઘરમાં જઈ ગોળી મારી દઈશ. મધુ શ્રીવાસ્તવે ફોર્મ ભરતા સમયે શક્તિ પ્રદર્શન કર્યુ હતું. આ સમયે તેમણે વિવાદિત નિવેદન આપીને પોતાની દબંગાઈ બતાવી હતી. હનુમાનજીની મૂર્તિ સાથે રાખીને મધુ શ્રીવાસ્તવે રેલી કાઢી હતી અને ફોર્મ ભર્યુ હતું. આ સમયે તેમણે કહ્યુ હતું કે, મારા વિરોધીઓને ચેતવણી આપુ છું કે આ ઇલેક્શન છેલ્લી પાયરીનું રહેશે.
