PM મોદીએ પાપુઆ ન્યુ ગિનીને તમિલ ક્લાસિક ‘થિરુક્કુરલ’ ભેટ આપી,લોકો ટોક પિસિન ભાષામાં વાંચી શકશે
દિલ્હી : ભારતના વડા પ્રધાન નરેન્દ્ર મોદીએ જેમ્સ મારાપે સાથે તાજેતરમાં પાપુઆ ન્યુ ગિનીમાં તમિલ ક્લાસિક પુસ્તક ‘થિરુક્કુરલ’નું વિમોચન કર્યું હતું. આ પુસ્તક ટોક પિસિન ભાષામાં બહાર પાડવામાં આવ્યું છે. તેની પાછળનો હેતુ ભારતીય વિચાર અને સંસ્કૃતિને આ દક્ષિણ-પશ્ચિમ પ્રશાંત રાષ્ટ્રના લોકોની નજીક લાવવાનો છે. પીએમ મોદી રવિવારે તેમની પ્રથમ મુલાકાતે પાપુઆ ન્યુ ગિની પહોંચ્યા હતા. આ દેશની મુલાકાત લેનારા તેઓ પ્રથમ ભારતીય વડાપ્રધાન છે. તેમણે મારાપે સાથે દ્વિપક્ષીય સંબંધોને પ્રોત્સાહન આપવા માટે ભારત અને 14 પેસિફિક ટાપુ દેશો વચ્ચે સમિટનું આયોજન કર્યું હતું.
ટોક પિસિન એ પાપુઆ ન્યુ ગિનીની સત્તાવાર ભાષા છે. વિદેશ મંત્રાલયે ટ્વીટ કરીને આ જાણકારી આપી છે. વિદેશ મંત્રાલયે લખ્યું, ‘ભારતીય ડાયસ્પોરા માતૃભૂમિ સાથે જીવંત સંપર્ક જાળવી રાખે છે! PM નરેન્દ્ર મોદી અને PM જેમ્સ મારાપેએ પાપુઆ ન્યુ ગિનીની ટોક પિસિન ભાષામાં તમિલ ક્લાસિક થિરુક્કુરલ રજૂ કર્યું. પશ્ચિમ ન્યુ બ્રિટન પ્રાંતના ગવર્નર સુભા સસેન્દ્રન અને સસેન્દ્રન મુથુવેલ દ્વારા લખાયેલ આ પુસ્તક ભારતીય વિચાર અને સંસ્કૃતિને પાપુઆ ન્યુ ગીનીના લોકોની નજીક લાવશે.
વડા પ્રધાન મોદીએ અગાઉ તેમની માતૃભાષા ગુજરાતીમાં પુસ્તકનો અનુવાદ બહાર પાડ્યો હતો. તેમણે અનેક પ્રસંગોએ તિરુક્કુરલની પ્રશંસા કરી છે. તેમના એક ભાષણમાં વડાપ્રધાને કહ્યું, ‘થિરુક્કુરલ માત્ર એક સાહિત્યિક શ્રેષ્ઠ કૃતિ નથી, પરંતુ સામાન્ય જીવન માટે એક અસાધારણ માર્ગદર્શક પણ છે. તે આપણને સચ્ચાઈનો માર્ગ બતાવે છે અને નિઃસ્વાર્થ જીવન જીવવા માટે પ્રેરણા આપે છે. તિરુક્કુરલ આજે પણ પ્રાસંગિક છે અને વર્તમાન પેઢી માટે પ્રેરણારૂપ બની શકે છે. તિરુક્કુરલ એ પ્રેરણાદાયી વિચારોનો ખજાનો છે જેને વિશ્વભરના યુવાનો વાંચી શકે છે અને તેનો લાભ લઈ શકે છે.’
