ચંડીગઢ : ભાજપનું મિશન 2024 આજથી હરિયાણામાં શરૂ થવા જઈ રહ્યું છે. હરિયાણામાં ભાજપ આજે લોકસભા ચૂંટણીનું બ્યુગલ ફૂંકવા જઈ રહ્યું છે. ચૂંટણી પ્રચારને વેગ આપવા માટે કેન્દ્રીય ગૃહમંત્રી અમિત શાહ આજે સિરસા પહોંચી રહ્યા છે. શાહની રેલી સાંજે 4 કલાકે યોજાવા જઈ રહી છે. જેને લઇ ભાજપ દ્વારા જોરશોરથી તૈયારીઓ હાથ ધરવામાં આવી છે. શાહના સ્વાગત માટે 14 પ્રકારના ફૂલોથી માળા તૈયાર કરવામાં આવી રહી છે. 6 લોકોની ટીમ દ્વારા તૈયાર કરવામાં આવેલા આ માળા પાછળ લગભગ 1 લાખ રૂપિયાનો ખર્ચ થવાનો છે.
બીજેપી નેતા ગોપાલ કાંડાએ દાવો કર્યો છે કે રેલીમાં લગભગ 1 લાખ લોકો પહોંચ્યા હતા. આ રેલીને આમંત્રણ આપવા માટે 50 જેટલા આગેવાનોને ફરજ પર મુકવામાં આવ્યા હતા. પોલીસે 150 લોકોને નોટિસ ફટકારી છે, તેમને કાયદો અને વ્યવસ્થા જાળવવા માટે પ્રતિબંધિત કર્યા છે. તે જ સમયે, શાહની રેલી પહેલા વિરોધ કરી રહેલા ઘણા નેતાઓને નજરકેદ કરવામાં આવ્યા છે.
કેન્દ્રીય ગૃહમંત્રી અમિત શાહની રેલીને ધ્યાનમાં રાખીને કડક સુરક્ષા વ્યવસ્થા કરવામાં આવી છે. ચાર હજાર પોલીસકર્મીઓની સાથે ADGP અને 36 DSP સહિત 28 IPS અધિકારીઓની ડ્યૂટી લગાવવામાં આવી છે.
2024ની લોકસભા ચૂંટણી માટે ભાજપનું ખાસ ફોકસ 164 લોકસભા બેઠકો પર છે. આ સીટોમાં હરિયાણાની સિરસા અને રોહતક સીટ પણ સામેલ છે. એવી બેઠકો પર પણ ફોકસ છે જ્યાં લોકસભાના સાંસદ છે પરંતુ ધારાસભ્ય નથી. કારણ કે હરિયાણામાં ભાજપ લોકસભાની સાથે વિધાનસભાની ચૂંટણીની તૈયારી કરી રહ્યું છે ભાજપના નેતાઓનું કહેવું છે કે 30 જૂન સુધીમાં હરિયાણાના ઘણા જિલ્લાઓમાં રેલીઓ યોજાવાની છે જેમાં કેન્દ્રીય ભાજપના નેતાઓ ભાગ લેવાના છે. શાહ આજે સિરસાના કાર્યકરોમાં ઉત્સાહ ફેલાવવા આવી રહ્યા છે. મીડિયા રિપોર્ટ્સ અનુસાર, ભાજપે પોતાના પહેલા સર્વેમાં એવી 50 સીટોને શોર્ટલિસ્ટ કરી છે જ્યાં તેમની સ્થિતિ નબળી છે. જેમાં સિરસા અને રોહતક સીટનો સમાવેશ થાય છે.
