દિલ્હી બાદ હવે બંગાળની ખાડીમાં જોરદાર ભૂકંપના આંચકા અનુભવાયા,જાણો કેટલી નોંધાઈ તીવ્રતા
- બંગાળની ખાડીમાં ભૂકંપના આંચકા
- રિક્ટર સ્કેલ પર 4.2 ની નોંધાઈ તીવ્રતા
- સવારે 5.32 કલાકે નોંધાયો ભૂકંપનો આંચકો
દિલ્હી: ભારત સહિત વિશ્વના વિવિધ દેશોમાં બનતી ભૂકંપની ઘટનાઓએ લોકોમાં ભયનો માહોલ સર્જ્યો છે. તાજેતરમાં દિલ્હીમાં થોડા દિવસોના અંતરાલમાં બે વાર ભૂકંપના તીવ્ર આંચકા અનુભવાયા છે. તે જ સમયે મંગળવારે વહેલી સવારે બંગાળની ખાડીમાં પણ ભૂકંપના તીવ્ર આંચકા અનુભવાયા હતા. ભૂકંપની વારંવારની ઘટનાઓએ લોકોને કોઈ અપ્રિય ઘટનાને લઈને ભયભીત કરી દીધા છે.
નેશનલ સેન્ટર ફોર સિસ્મોલોજી દ્વારા આપવામાં આવેલી માહિતી અનુસાર, સવારે 5.32 કલાકે બંગાળની ખાડીમાં ભૂકંપના તીવ્ર આંચકા અનુભવાયા હતા. આ ભૂકંપની તીવ્રતા રિક્ટર સ્કેલ પર 4.2 માપવામાં આવી છે. મળેલી માહિતી મુજબ બંગાળની ખાડીમાં આવેલા આ ભૂકંપનું કેન્દ્રબિંદુ 10 કિલોમીટરની અંદર હતું.
સોમવારે સાંજે દિલ્હી-NCR સહિત ઉત્તર ભારતના ઘણા ભાગોમાં 5.6ની તીવ્રતાનો ભૂકંપ આવ્યો હતો. ત્રણ દિવસમાં આ બીજો અને એક મહિનાથી ઓછા સમયમાં ત્રીજો ભૂકંપ હતો. આ પહેલા 4 નવેમ્બરે નેપાળમાં ભૂકંપ આવ્યો હતો જેમાં અનેક લોકોના મોત થયા હતા. આ ભૂકંપના જોરદાર આંચકાએ સમગ્ર ઉત્તર ભારતને હચમચાવી નાખ્યું હતું. વારંવાર આવતા ભૂકંપોએ ફરી એકવાર હિમાલયના વિશાળકાય ભૂકંપની ચર્ચા શરૂ કરી છે.
લાંબા સમયથી વૈજ્ઞાનિકો નિયમિતપણે ભયંકર ચેતવણી જારી કરે છે કે હિમાલયના પ્રદેશમાં 8.5 થી વધુની તીવ્રતાનો મોટો ભૂકંપ આવવાનો છે. ભારતીય સિસ્મોલોજિસ્ટ્સની આગેવાની હેઠળના 2018ના અભ્યાસમાં સૂચવવામાં આવ્યું છે કે ઉત્તરાખંડથી પશ્ચિમ નેપાળ સુધી વિસ્તરેલો મધ્ય હિમાલય “ભવિષ્યમાં અમુક સમયે” પ્રભાવિત થઈ શકે છે.
