ભારતમાં કોરોનાનો પગપેસારો,કેરળમાં 300 કેસ; જયપુર-મહારાષ્ટ્રમાં નવા દર્દીઓના આગમનને કારણે એલર્ટ જારી કરાયું
દિલ્હી: દેશમાં ફરી એકવાર કોરોનાના કેસ ધીમે ધીમે વધી રહ્યા છે. દેશમાં કોરોનાના નવા વેરિયન્ટ સ્ટ્રેન JN.1ની શોધ બાદ કેન્દ્ર અને રાજ્ય સરકારો સતર્ક થઈ ગઈ છે.આ દરમિયાન આરોગ્ય અને પરિવાર કલ્યાણ મંત્રાલયના જણાવ્યા અનુસાર કેરળમાં 20 ડિસેમ્બરે COVID-19 ના 300 નવા સક્રિય કેસ અને ત્રણ મૃત્યુ નોંધાયા હતા. દેશમાં કોવિડ-19ના સક્રિય કેસની કુલ સંખ્યા 2,669 છે.
કેરળના આરોગ્ય નિષ્ણાતે બુધવારે જણાવ્યું હતું કે રોગના કેસમાં ઘટાડો થયો હોવા છતાં કોવિડને સંપૂર્ણપણે નાબૂદ કરી શકાતો નથી. કેન્દ્રીય આરોગ્ય મંત્રીએ તમામ રાજ્યોને એલર્ટ રહેવા, દેખરેખ વધારવા અને દવાઓ, ઓક્સિજન સિલિન્ડર, વેન્ટિલેટર અને રસીઓનો પૂરતો સ્ટોક સુનિશ્ચિત કરવા વિનંતી કરી છે.
અગાઉ બુધવારે કેન્દ્રીય આરોગ્ય પ્રધાન મનસુખ માંડવિયાએ ટોચના અધિકારીઓ અને મુખ્ય આરોગ્ય સચિવો સાથે પાંચ રાજ્યો – કેરળ, દિલ્હી, ગોવા, ગુજરાત અને કર્ણાટકમાં વધતા કોવિડ -19 કેસ વચ્ચે ઉચ્ચ સ્તરીય બેઠકની અધ્યક્ષતા કરી હતી.
દેશમાં કોવિડ-19ના વધતા જતા કેસ વચ્ચે રાજસ્થાનમાં બે નવા કેસ નોંધાયા છે. જયપુરની સવાઈ માન સિંહ હોસ્પિટલ અને જેકે લોન હોસ્પિટલમાં બે કોવિડ -19 પોઝિટિવ કેસ મળી આવ્યા હતા. બંને દર્દીઓ અન્ય જિલ્લામાંથી જયપુર સારવાર માટે આવ્યા હતા. વધારાના આરોગ્ય નિયામકએ પુષ્ટિ કરી કે એક દર્દી ભરતપુરનો અને બીજો ઝુંઝુનુનો હોવાનું કહેવાય છે.
મહારાષ્ટ્રમાં એક દર્દીમાં નવા કોવિડ સબ-સ્ટ્રેન મળી આવ્યા બાદ ગભરાટ ફેલાયો છે. મહારાષ્ટ્રના આરોગ્ય પ્રધાન તાનાજી સાવંતે પત્રકારો સાથે વાત કરતાં જણાવ્યું હતું કે,રાજ્યની આરોગ્યસંભાળ સિસ્ટમ નવા કોવિડ વેરિયન્ટ JN.1 સાથે વ્યવહાર કરવા માટે સંપૂર્ણ રીતે તૈયાર છે.તેમણે કહ્યું કે લોકોએ ગભરાવાનું કોઈ કારણ નથી. તેમણે વધુમાં કહ્યું કે જો લોકોને કોઈ પણ પ્રકારના લક્ષણો દેખાય તો તેઓએ ડૉક્ટરની સલાહ લેવી જોઈએ અને જરૂરી દવાઓ લેવી જોઈએ. તેમણે એમ પણ કહ્યું કે તેઓએ જાહેર સુરક્ષાના હિતમાં કોવિડ પ્રોટોકોલનું પણ પાલન કરવું જોઈએ.
