દેશનો પ્રથમ ઈ-હાઈવે જયપુર-દિલ્હી વચ્ચે બનાવાશે

નવી દિલ્હી: દેશમાં પર્યાવરણને ધ્યાનમાં રાખીને સરકાર ઇલેક્ટ્રિક વાહનોના ઉપયોગ પર ખૂબ ભાર આપી રહી છે. ઈલેક્ટ્રિક બસ, કાર, બાઇક, સ્કૂટી બાદ હવે દેશમાં ઈલેક્ટ્રિક હાઈવે પણ બનવા જઈ રહ્યો છે. હા, કેન્દ્રીય રોડ ટ્રાન્સપોર્ટ અને હાઈવે મિનિસ્ટર નીતિન ગડકરીએ સોમવારે રાજસ્થાનમાં વિવિધ રોડ પ્રોજેક્ટ્સનું લોકાર્પણ કરતી વખતે જાહેરાત કરી છે કે જયપુર અને દિલ્હી વચ્ચે ટૂંક સમયમાં ઈલેક્ટ્રિક હાઈવે બનાવવામાં આવશે.

દેશમાં ઈ-હાઈવેનો આ પ્રથમ ઉપયોગ

આ ઈલેક્ટ્રિક હાઈવે દિલ્હી-મુંબઈ એક્સપ્રેસ વેની સાથે નવી લેન પર બનાવવામાં આવશે. જયપુર અને દિલ્હી વચ્ચે દેશમાં ઈ-હાઈવેનો આ પ્રથમ ઉપયોગ હશે. ઈ-હાઈવેના કોન્સેપ્ટ અંગે તેમણે જણાવ્યું હતું કે, એક બસ જેટલી લાંબી ત્રણ બસ રોડ ઉપરથી પસાર થતી ઈલેક્ટ્રીક લાઈન સાથે જોડાયેલ હશે. આ બસોની મુસાફરીથી મુસાફરોને એરોપ્લેનમાં મુસાફરી કરવાની અનુભૂતિ થશે. તેનું ભાડું પણ તુલનાત્મક રીતે ઓછું હશે.

કેન્દ્રીય મંત્રી નીતિન ગડકરીએ સોમવારે ઉદયપુરમાં મહારાણા પ્રતાપ એરપોર્ટ નજીક એક ખાનગી રિસોર્ટમાં આયોજિત એક કાર્યક્રમને સંબોધિત કરતા આ વાત કહી. મુખ્યમંત્રી ભજનલાલ શર્મા, નાયબ મુખ્યમંત્રી દિયા કુમારી, ભાજપના પ્રદેશ અધ્યક્ષ અને ચિત્તોડગઢના સાંસદ સીપી જોશી અને વિવિધ જનપ્રતિનિધિઓની હાજરીમાં કેન્દ્રીય મંત્રી નીતિન ગડકરીએ રાજસ્થાનમાં 2500 કરોડ રૂપિયાના 17 રોડ પ્રોજેક્ટનું ઉદ્ઘાટન અને શિલાન્યાસ પણ કર્યો હતો.

ઇ હાઇવેનું મહત્વ

સામાન્ય રીતે હાઈવે પર ચાલતા વાહનો પેટ્રોલ, ડીઝલ કે સીએનજી પર ચાલે છે, પરંતુ ઈલેક્ટ્રિક હાઈવે એવો હાઈવે હશે જેના પર ઈલેક્ટ્રિક વાહનો ચાલશે. જો આપણે ઈલેક્ટ્રીક એટલે કે ઈ-હાઈવેને સાદી ભાષામાં સમજીએ તો જે રીતે ટ્રેન ઈલેક્ટ્રિસિટી પર ચાલે છે તેવી જ રીતે ઈ-હાઈવે પર ઈલેક્ટ્રીક વાયર લગાવવામાં આવશે અને તેની સાથે વાહનોને જોડવામાં આવશે. આ વાયરોમાંથી વાહનોને આપવામાં આવતી વીજળી બળતણ તરીકે કામ કરશે. ભારત માટે આ એક નવી પ્રકારની પરિવહન વ્યવસ્થા હશે.

ઈ-હાઈવે શા માટે જરૂરી છે?

ઉલ્લેખનીય છે કે ભારત સરકાર ગ્રીનહાઉસ ગેસના ઉત્સર્જનને ઘટાડવા માટે પ્રતિબદ્ધ છે. પીએમ મોદીએ નવેમ્બર 2021માં જાહેરાત કરી હતી કે ભારત વર્ષ 2070 સુધીમાં ચોખ્ખા શૂન્ય ઉત્સર્જનનું લક્ષ્ય હાંસલ કરશે. આ ઈલેક્ટ્રિક હાઈવે એ લક્ષ્ય હાંસલ કરવાની દિશામાં એક મહત્વપૂર્ણ પગલું છે. આ હાઈવે સંપૂર્ણપણે ઈકો ફ્રેન્ડલી હશે અને પ્રદુષણમાં ઘટાડો કરશે. આમાં વાહનો ચલાવવા માટે વીજળીનો ઉપયોગ કરવામાં આવશે જે પેટ્રોલ અને ડીઝલ કરતા સસ્તી હશે. જ્યારે આનાથી પેટ્રોલ અને ડીઝલ પર સીધી નિર્ભરતા ઘટશે, તે પર્યાવરણ માટે પણ ફાયદાકારક રહેશે.

ઈ-હાઈવેના ફાયદા

પર્યાવરણ માટે ફાયદાકારક હોવા ઉપરાંત, ઈ-હાઈવે લોજિસ્ટિક્સ ખર્ચમાં પણ ઘટાડો કરશે. હાલમાં માલસામાનના ભાવમાં વધારો થવાનું મુખ્ય કારણ પરિવહન ખર્ચ છે. જો પરિવહન ખર્ચ ઘટે તો વસ્તુઓ સસ્તી થઈ શકે છે.