બધા દિવસો સરખા નથી હોતા’ સાંગલીમાં રેલીને સંબોધતા ભાજપ પર ઉદ્ધવ ઠાકરેનો પ્રહાર

મહારાષ્ટ્રની સાંગલી લોકસભા સીટને લઈને મહા વિકાસ આઘાડી વચ્ચે ખેંચતાણ ચાલી રહી છે. દરમિયાન, શિવસેના (યુબીટી)ના નેતા ઉદ્ધવ ઠાકરેએ ગુરુવારે (2 મે) જણાવ્યું હતું કે તેમની પાર્ટીએ ગઠબંધન ખાતર તેના સાથી પક્ષો માટે બેઠકો છોડી દીધી છે, જે તેણે પાંચ વખત જીતી હતી.

નિરંકુશતા સામેની લડાઇમાં મતોનું વિભાજન ન થવા દેતાઃ ઉદ્ધવ

સાંગલીમાં પોતાના પક્ષના ઉમેદવાર ચંદ્રહર પાટીલ માટે એક રેલીને સંબોધતા, ઉદ્ધવ ઠાકરેએ મતદારોને નિરંકુશતા સામેની લડાઈમાં મતોનું વિભાજન ન થવા દેવાની અપીલ કરી હતી. તેમણે ભાજપને ચેતવણી પણ આપી હતી કે બધા દિવસો સરખા નથી હોતા. ઠાકરેએ વિશ્વાસ વ્યક્ત કર્યો કે ‘ ઇન્ડિયા’ ગઠબંધન 300 લોકસભા બેઠકો જીતશે.

‘અમે ઘણી બેઠકો છોડી દીધી’

કોંગ્રેસના નેતા અને મહારાષ્ટ્રના પૂર્વ મુખ્યમંત્રી સ્વર્ગસ્થ વસંતદાદા પાટીલના પૌત્ર વિશાલ પાટીલ સાંગલી બેઠક પરથી અપક્ષ ઉમેદવાર તરીકે ચૂંટણી લડી રહ્યા છે. ભાજપે વર્તમાન સાંસદ સંજય કાકા પાટીલને મેદાનમાં ઉતાર્યા છે. ઉદ્ધવ ઠાકરેએ કહ્યું, ‘અમે રામટેક સીટ છોડી દીધી છે, જે અમે સતત પાંચ વખત જીતી છે. અમે કોલ્હાપુર બેઠક છત્રપતિ શાહુ મહારાજ માટે છોડી દીધી. અમે અમરાવતી પણ છોડી દીધું, કારણ કે ગઠબંધનથી માત્ર મને જ ફાયદો થવાનો નથી, પરંતુ અમારા સહયોગીઓને પણ ફાયદો થવાનો છે..

અહીં સાથે મળીને ચૂંટણી લડી રહી છે આ પાર્ટીઓ

કોંગ્રેસ અમરાવતી, રામટેક અને કોલ્હાપુર બેઠકો પર ઉદ્ધવ ઠાકરેની પાર્ટી અને શરદ પવારની પાર્ટી સાથે મળીને ચૂંટણી લડી રહી છે. ઠાકરેએ સ્થાનિક કોંગ્રેસના નેતાઓને પણ ખાતરી આપી હતી કે તેમની પાર્ટી ભવિષ્યમાં તેમની વચ્ચે ઊભી રહેશે નહીં. આ એક સંકેત છે કે શિવસેના (UBT) જિલ્લામાં તેની પરંપરાગત બેઠકો પર દાવો કરશે નહીં. ઉદ્ધવ ઠાકરેએ એમ પણ કહ્યું કે જો ભાજપે તેમની સાથે દગો ન કર્યો હોત તો તેઓ તેમની સાથે જ રહ્યા હોત.