સુપ્રીમ કોર્ટે પીએમ મોદી પર ચૂંટણી લડવા પર પ્રતિબંધ લગાવવાની અરજી ફગાવી
નવી દિલ્હીઃ પીએમ મોદીને ચૂંટણી લડવા પર પ્રતિબંધ મૂકવાની માંગ કરતી અરજીને સુપ્રીમ કોર્ટે ફગાવી દીધી છે. અરજીમાં પીએમ મોદી પર નફરતભર્યા ભાષણો આપવાનો આરોપ લગાવ્યો હતો અને તેમના પર ચૂંટણી લડવા પર પ્રતિબંધ લગાવવાની માંગ કરવામાં આવી હતી. અરજીમાં પીએમ મોદી વિરૂદ્ધ નફરત ફેલાવનાર ભાષણ આપવા અને ચૂંટણી આચાર સંહિતાનું ઉલ્લંઘન કરવાનો આરોપ લગાવવામાં આવ્યો હતો. ન્યાયાધીશ વિક્રમ નાથ અને એસસી શર્માની બેંચે અરજદારને તેની ફરિયાદ સંબંધિત ઓથોરિટી સમક્ષ કરવાનો નિર્દેશ આપ્યો હતો.
કેસની હકીકત અનુસાર, ફાતિમા નામની મહિલાએ વકીલ આનંદ એસ જોંધલે મારફતે અરજી દાખલ કરી હતી. અરજીમાં પીએમ મોદી પર જનપ્રતિનિધિત્વ અધિનિયમ હેઠળ ચૂંટણી લડવા પર છ વર્ષનો પ્રતિબંધ લગાવવાની માંગ કરવામાં આવી હતી. ચૂંટણી પ્રચાર દરમિયાન દ્વેષપૂર્ણ ભાષણો રોકવા માટે ચૂંટણી પંચને નિર્દેશ આપતી બીજી અરજી પણ સુપ્રીમ કોર્ટમાં દાખલ કરવામાં આવી હતી. સુપ્રીમ કોર્ટે પણ આ અરજી ફગાવી દીધી હતી. દિલ્હી હાઈકોર્ટમાં અરજી દાખલ કરીને આવી જ માંગ કરવામાં આવી હતી, પરંતુ દિલ્હી હાઈકોર્ટે પણ અરજી ફગાવી દીધી હતી. હાઈકોર્ટે કહ્યું કે તેઓ ચૂંટણી પંચના કામકાજ પર દેખરેખ રાખી શકતા નથી. ચૂંટણી પંચ પણ એક બંધારણીય સંસ્થા છે અને તે માની શકાય નહીં કે તે આ મામલે કંઈ કરી રહ્યું નથી.
દેશમાં હાલ લોકસભા ચૂંટણીનો માહોલ જામ્યો છે. અત્યાર સુધીમાં ચાર તબક્કાનું મતદાન શાંતિપૂર્ણ માહોલમાં સંપન્ન થયું છે. હજુ 3 તબક્કાનું મતદાન બાકી છે. આગામી તા. 4 જૂનના રોજ મતગણતરી હાથ ધરવામાં આવશે.
