નવી દિલ્હીઃ ઓડિશાના નવા મુખ્યમંત્રી તરીકે મોહન માઝીની પસંદગી કરવામાં આવશે. તેઓ ભાજપના ધારાસભ્ય દળના નેતા તરીકે ચૂંટાયા હતા. રક્ષા મંત્રી રાજનાથ સિંહ અને પર્યાવરણ મંત્રી ભૂપેન્દ્ર યાદવ કેન્દ્રીય નિરીક્ષકો તરીકે બેઠકમાં હાજર હતા. ભુવનેશ્વરમાં મળેલી બેઠકમાં માઝીના નામની જાહેરાત કરવામાં આવી હતી. ઓડિશા વિધાનસભા ચૂંટણીમાં ભાજપે જંગી જીત નોંધાવી છે અને લગભગ 24 વર્ષથી ઓડિશામાં સત્તામાં રહેલી બીજેડીને હટાવી દીધી છે.
ઓડિશામાં બીજેપી વિધાયક દળના નેતાની પસંદગી માટેની બેઠક સાંજે યોજાઈ હતી. આ બેઠકમાં રાજનાથ સિંહ અને ભૂપેન્દ્ર યાદવ પણ હાજર હતા. મીડિયા રિપોર્ટ્સમાં દાવો કરવામાં આવ્યો છે કે, ભાજપ ઓડિશામાં ડેપ્યુટી સીએમની પણ નિમણૂક કરી શકે છે. વિધાયક દળના નેતાની પસંદગી કર્યા બાદ ભાજપના નેતાઓ હવે રાજ્યપાલને મળશે અને સરકાર બનાવવાનો દાવો કરશે. ઓડિશામાં પણ બુધવારે સીએમ પદ માટે શપથ ગ્રહણ સમારોહ યોજાનાર છે. આ શપથ ગ્રહણ સમારોહમાં વડાપ્રધાન મોદી પણ હાજર રહી શકે છે. ભાજપે શપથ ગ્રહણ સમારોહ માટે બીજેડી નેતા નવીન પટનાયકને પણ આમંત્રણ આપ્યું છે. શપથ ગ્રહણ સમારોહને કારણે ઓડિશામાં 12 જૂને અડધા દિવસની રજા જાહેર કરવામાં આવી છે.
અત્રે ઉલ્લેખનીય છે કે ચૂંટણી પ્રચાર દરમિયાન વડાપ્રધાન નરેન્દ્ર મોદીએ ઓડિશાના લોકોને વચન આપ્યું હતું કે માત્ર ઓડિયા ભાષા બોલનાર વ્યક્તિ જ રાજ્યનો મુખ્યમંત્રી બનશે. ઓડિશામાં મુખ્યમંત્રીના શપથ ગ્રહણ સમારોહ માટે સંતો અને ઋષિઓને પણ આમંત્રણ મોકલવામાં આવ્યું છે. ઓડિશા વિધાનસભા ચૂંટણીમાં ભાજપે રાજ્યની 147 વિધાનસભા બેઠકોમાંથી 78 બેઠકો જીતી છે. જ્યારે બીજેડી 51 બેઠકો સાથે બીજા નંબરની સૌથી મોટી પાર્ટી છે. રાજ્યમાં કોંગ્રેસને 14 બેઠકો મળી છે, જ્યારે CPIMને 1 બેઠક મળી છે. ત્રણ બેઠકો પર અપક્ષ ઉમેદવારોનો વિજય થયો છે.
