નવી દિલ્હીઃ કન્ઝ્યુમર પ્રાઈસ ઈન્ડેક્સ (CPI) પર આધારિત દેશનો છૂટક ફુગાવો મે મહિનામાં વાર્ષિક 4.75%ના નીચલા સ્તરે આવી ગયો છે. નેશનલ સ્ટેટિસ્ટિકલ ઑફિસ (NSO)એ જાહેર કરાયેલા ડેટા અનુસાર, ખાદ્ય ચીજવસ્તુઓના ભાવમાં થોડો ઘટાડો થવાને કારણે ગ્રાહક ભાવ સૂચકાંક પર આધારિત છૂટક ફુગાવો ઘટીને 4.75%ના નીચલા સ્તરે પહોંચી ગયો છે.
એપ્રિલ 2024માં છૂટક ફુગાવો 4.83% હતો. આ સાથે ફેબ્રુઆરી 2024થી એકંદર ફુગાવામાં સતત ઘટાડો થઈ રહ્યો છે. ફેબ્રુઆરીમાં તે 5.1% હતો અને એપ્રિલ 2024માં તે ઘટીને 4.83% થયો હતો. ફુગાવો મે મહિનામાં ઘટીને 4.75% થયો છે.
નોંધનીય છે કે આ મહિનાની શરૂઆતમાં, ભારતીય રિઝર્વ બેંકે ચાલુ નાણાકીય વર્ષ 2024-25 માટે CPI આધારિત છૂટક ફુગાવો 4.5% રહેવાનો અંદાજ મૂક્યો હતો. પ્રથમ ક્વાર્ટરમાં 4.9%, બીજા ક્વાર્ટરમાં 3.8%, ત્રીજા ક્વાર્ટરમાં 4.6% અને ચોથા ક્વાર્ટરમાં 4.5% રહેવાનો અંદાજ છે. રિટેલ ફુગાવાનો દર 2%ના તફાવત સાથે 4% પર રહે તેની ખાતરી કરવાની જવાબદારી સરકારે રિઝર્વ બેંકને સોંપી છે.
