લક્ષદ્વીપમાં પ્રવાસીઓની સંખ્યામાં વધારો, 3 મહિનામાં 22990 પ્રવાસીઓએ લીધી મુલાકાત
- ગયા વર્ષે 3 મહિનામાં 11074 પ્રવાસીઓ ગયા હતા
- લક્ષદ્વીપ જતી ફ્લાઈટ સેવાઓમાં થયો વધારો
નવી દિલ્હીઃ વડાપ્રધાન નરેન્દ્ર મોદીની લક્ષદ્વીપની મુલાકાત બાદ આ કેન્દ્રશાસિત પ્રદેશમાં પર્યટનને નવી પાંખો મળી છે. PMની ભારતીયોને લક્ષદ્વીપની મુલાકાત લેવાની વિનંતીની અસર હવે દેખાઈ રહી છે. સરકારી ડેટા અનુસાર, ભારતીય ટાપુ પર જનારા મુસાફરોની સંખ્યા આ વર્ષે એપ્રિલ-જૂનમાં બમણી થઈને 22,990 થઈ ગઈ છે જે ગયા વર્ષના સમાન સમયગાળામાં 11,074 હતી. દરમિયાન એરક્રાફ્ટ મૂવમેન્ટમાં પણ 88 ટકાનો વધારો થયો છે. જે ગયા વર્ષે 418 થી વધીને આ વર્ષે 786 થઈ ગઈ છે. આ ડેટાનું વિશ્લેષણ સ્પષ્ટપણે દર્શાવે છે કે એરલાઇન કંપનીઓએ તેમની ક્ષમતામાં વધારો કર્યો છે. આ વર્ષે જુલાઈમાં 31 જુલાઈ, 2023 સુધીમાં લક્ષદ્વીપની ફ્લાઈટ્સની સંખ્યા 3.5 ગણી વધીને 106 થઈ ગઈ છે. કુલ બેઠકોની સંખ્યા પણ જુલાઈ 2023માં 2,170 હતી જે જુલાઈ 2024માં વધીને 7,844 થઈ ગઈ છે. 2023માં કોચીથી માત્ર એક જ એરલાઈન ઉડાન ભરી હતી. પરંતુ આ વર્ષે જુલાઈમાં ત્રણ એવિએશન કંપનીઓએ તેમની સેવાઓ શરૂ કરી દીધી છે.
ટ્રાવેલ બિઝનેસ સાથે જોડાયેલા નિષ્ણાતોનું કહેવું છે કે, ઘણા પ્રવાસીઓ લક્ષદ્વીપ જવા માટે રસ દાખવી રહ્યા છે. આને ધ્યાનમાં રાખીને ઘણી એરલાઇન કંપનીઓએ લક્ષદ્વીપ માટે તેમની સેવાઓ શરૂ કરી છે. ઈન્ડિગોની આ વર્ષે ફેબ્રુઆરી સુધી લક્ષદ્વીપ માટે કોઈ ફ્લાઈટ નહોતી પરંતુ કંપનીએ જુલાઈમાં કોચી અને બેંગલુરુથી 53 ફ્લાઈટ્સ ઓપરેટ કરી હતી. ગોવા ફ્લાય 91, જે સીધી ફ્લાઇટ સેવાઓ પ્રદાન કરે છે, તેણે આ મહિને 21 ફ્લાઇટ્સનું સંચાલન પણ કર્યું છે. હાલમાં લક્ષદ્વીપમાં માત્ર ટર્બો પ્લેન જ ઉતરી શકે છે. પરંતુ એક વખત નવું એરપોર્ટ બની ગયા બાદ મોટા પ્લેન પણ અહીં ઉતરી શકશે.
ટ્રાવેલ એજન્ટ ફેડરેશનનું માનવું છે કે, લક્ષદ્વીપમાં એરપોર્ટના વિસ્તરણ બાદ પ્રવાસીઓની સંખ્યામાં ઓછામાં ઓછો ત્રણ ગણો વધારો થઈ શકે છે. આ દિવસોમાં મોટાભાગની ફ્લાઇટ્સ ફુલ છે. તેથી માંગ વધારે છે. પરંતુ ભારે માંગને જોતા આગામી દિવસોમાં વધુ નવી ફ્લાઈટ્સ શરૂ થવાની આશા છે. વધતા પ્રવાસીઓને જોતા લક્ષદ્વીપમાં નવા રિસોર્ટ અને હોટલ પણ બનાવવામાં આવી રહી છે. માલદીવના ઈમિગ્રેશનના આંકડા દર્શાવે છે કે આ વર્ષે એપ્રિલ-જુલાઈ વચ્ચે ભારતીય પ્રવાસીઓની કુલ સંખ્યામાં 45 ટકાનો મોટો ઘટાડો થયો છે. ગયા વર્ષે એપ્રિલ-જુલાઈમાં તે 66,375 હતો, જે આ વર્ષે સમાન સમયગાળામાં ઘટીને 36,761 થઈ ગયો છે. આ ઉપરાંત, માલદીવમાં ભારતીય પ્રવાસીઓનો હિસ્સો પણ આ વર્ષના સમાન સમયગાળા દરમિયાન 12 ટકાથી ઘટીને 6.3 ટકા થઈ ગયો છે.
