અમેરિકામાં વ્યાજદર ઘટતાની સાથે ભારતીય શેરબજારમાં ઉછાળો
- ભારતીય શેરબજાર લીલા નિશાન ઉપર ખુલ્યું
- ભારતની સાથે અન્ય વૈશ્વિક બજારોમાં પણ તેજીનો ટ્રેન્ડ જોવા મળ્યો
મુંબઈઃ આજરોજ ભારતીય શેરબજાર ટ્રેડિંગ સેશનમાં ઉછાળો નોંધાયો છે. બજારમાં ચોતરફ તેજી જોવા મળી રહી છે. સવારે 9:20 વાગ્યે સેન્સેક્સ 224 પોઈન્ટ એટલે કે 0.28 ટકા વધીને 81,316 પર હતો અને નિફ્ટી 57 પોઈન્ટ સાથે 0.23 ટકા વધીને 24,880 પર હતો. 1,486 શેર લીલા નિશાનમાં છે અને 619 શેર લાલ નિશાનમાં છે.
શેરબજારમાં ઉછાળાનું કારણ યુએસ ફેડના ચેરમેન પોવેલ દ્વારા વ્યાજદરમાં ઘટાડાનો સંકેત છે, જેના કારણે ભારતની સાથે અન્ય વૈશ્વિક બજારોમાં પણ તેજીનો ટ્રેન્ડ જોવા મળી રહ્યો છે. આઇટી, ફિન સર્વિસ, મેટલ, મીડિયા અને એનર્જી ઇન્ડેક્સમાં વધારો થયો છે. ફાર્મા, એફએમસીજી અને રિયલ્ટીમાં સંઘર્ષ જોવા મળી રહ્યો છે. વિપ્રો, ટેક મહિન્દ્રા, ટીસીએસ, એચડીએફસી બેંક, ઇન્ફોસીસ, પાવર ગ્રીડ, એક્સિસ બેંક, એચસીએલ ટેક, ટાટા મોટર્સ અને ટાટા સ્ટીલ સેન્સેક્સમાં ટોપ ગેઇનર છે.
તો ITC, સન ફાર્મા, મારુતિ સુઝુકી, JSW Steel અને અલ્ટ્રાટેક સિમેન્ટ ટોપ લુઝર છે. એશિયન બજારોમાં મિશ્ર કારોબાર જોવા મળી રહ્યો છે. બેંગકોક, હોંગકોંગ અને જકાર્તામાં ઉછાળો છે. તે જ સમયે, ટોક્યો, શાંઘાઈ અને સિયોલમાં ઘટાડો છે. જોકે અમેરિકન બજારો જોરદાર ગતિ સાથે બંધ થયા. બજારના નિષ્ણાતોનું કહેવું છે કે યુએસ ફેડ ચીફ પોવેલે સ્પષ્ટ કર્યું છે કે આગામી સમયમાં વ્યાજદરમાં ઘટાડો કરવામાં આવશે. જેના કારણે શુક્રવારના સેશનમાં યુએસ માર્કેટમાં મોટો ઉછાળો જોવા મળ્યો હતો. તેની અસર ભારતીય બજારો પર પણ જોવા મળી રહી છે. અમેરિકામાં વ્યાજદરમાં ઘટાડા બાદ ભારતની કેન્દ્રીય બેંક આરબીઆઈ પણ આગામી MPC બેઠકમાં વ્યાજદરમાં ઘટાડાનું એલાન કરી શકે છે.
