- સરદાર સરોવર ડેમમાં 86 ટકાથી વધુ જળસંગ્રહ,
- 18 ડેમો 50 ટકાથી 70 ટકા ભરાયાં,
- 9 ડેમોમાં 25 ટકાથી ઓછો જળસંગ્રહ
ગાંધીનગરઃ ગુજરાતમાં મેઘરાજાની સાર્વત્રિક મહેરના પરિણામે 206 જળાશયોમાંથી 113 જળાશયો સંપૂર્ણ એટલે કે 100 ટકા જ્યારે 43 જળાશયો-ડેમ 70 થી 100 ટકા વચ્ચે ભરાતા હાઈ એલર્ટ જાહેર કરાયા છે. આ સિવાય રાજ્યના 18 ડેમ 50 ટકાથી 70 ટકા ભરાતા એલર્ટ અપાયું છે. જ્યારે 23 ડેમમાં 25 થી 50 ટકા વચ્ચે તેમજ નવ ડેમમાં 25 ટકાથી ઓછું પાણી સંગ્રહ થયું છે.
આ સિવાય ગુજરાતની જીવાદોરી સમાન સરદાર સરોવર યોજનામાં હાલમાં 2,87,701 એમ.સી.એફ.ટી. એટલે કે કુલ સંગ્રહ શક્તિના 86 ટકાથી વધુ જળસંગ્રહ નોંધાયો છે. જ્યારે રાજ્યના અન્ય 206 જળાશયોમાં 4,39,485 એમ.સી.એફ.ટી. એટલે કે કુલ સંગ્રહ શક્તિના 78.45 ટકા જેટલો જળસંગ્રહ નોંધાયો છે. આમ રાજ્યના કુલ 207 જળાશયોમાં 81 ટકાથી વધુ જળસંગ્રહ થયો છે તેમ, જળ સંપત્તિ વિભાગના અહેવાલમાં જણાવાયું છે.
આજે સવારે 8.00 કલાકના અહેવાલ મુજબ રાજ્યમાં વરસાદના પરિણામે સૌથી વધુ સરદાર સરોવર યોજનામાં 1.14 લાખ ક્યુસેક પાણીની આવક સામે 79 હજાર ક્યુસેક પાણી છોડવામાં આવી રહ્યું છે. જ્યારે ઉકાઈમાં 48 હજાર ક્યુસેક પાણીની આવક સામે 16 હજારની જાવક, વણાકબોરી જળાશયમાં 21 હજાર ક્યુસેક પાણીની આવક સામે 21 હજારની જાવક અને કડાણા જળાશયમાં 18 હજાર ક્યુસેક પાણીની આવક સામે 15 હજારની ક્યુસેક પાણીની જાવક નોંધાઈ છે.
આ ઉપરાંત સૌથી વધુ મધ્ય ગુજરાતના 17 જળાશયોમાં 93 ટકા, કચ્છના 20 જળાશયોમાં 87 ટકા, સૌરાષ્ટ્રના 141માં 82 ટકા, દક્ષિણ ગુજરાતના 13માં 79 ટકા, જ્યારે ઉત્તર ગુજરાતના 15 જળાશયોમાં 50 ટકાથી વધુ પાણીનો સંગ્રહ થયો છે. આમ સરદાર સરોવર સહિત 207 જળાશયોમાં અત્યાર સુધીમાં 81 ટકાથી વધુ પાણીનો જથ્થો સંગ્રહાયો છે. ગત વર્ષે આ સમયે આ 207 જળાશયોમાં 76 ટકાથી વધુ જળસંગ્રહ નોંધાયો હતો તેમ, જળ સંપત્તિ વિભાગની યાદીમાં વધુમાં જણાવ્યું છે.
