મુસ્લિમ પરિવારમાં જન્મ્યા હોવા છતાં નાસ્તિક વ્યક્તિ પર શરિયતને બદલે સામાન્ય નાગરિક કાયદા લાગુ થઈ શકે? સુપ્રીમ કોર્ટે કેન્દ્રને આ મહત્વપૂર્ણ પ્રશ્ન પર જવાબ દાખલ કરવા કહ્યું છે. કેરળની રહેવાસી સફિયા નામની યુવતીએ કોર્ટમાં અરજી કરી છે. તેણે રજુઆત કરી હતી કે, તેનો પરિવાર નાસ્તિક છે, પરંતુ શરિયતની જોગવાઈઓને કારણે તેના પિતા તેને ઈચ્છે તો પણ તેની મિલકતના 1 તૃતીયાંશથી વધુ આપી શકતા નથી.
સુપ્રીમ કોર્ટમાં થયેલી સુનાવણીમાં એડિશનલ સોલિસિટર જનરલ ઐશ્વર્યા ભાટીએ કહ્યું કે કેન્દ્ર સરકાર આ અંગે જવાબ દાખલ કરશે. તેમણે એમ પણ કહ્યું કે યુનિફોર્મ સિવિલ કોડ (યુસીસી) લાવવાનો વિચાર ચાલી રહ્યો છે, પરંતુ તે ક્યારે આવશે અથવા આવશે કે નહીં તે હાલ કહી શકાય નહીં.
મુસ્લિમ પર્સનલ લો (શરિયત) એપ્લિકેશન એક્ટ 1937 મુજબ, મુસ્લિમ મહિલા તેના પરિવારની સંપત્તિના એક તૃતીયાંશથી વધુ વારસામાં મેળવી શકતી નથી. જો તેણી એકમાત્ર સંતાન હોય, તો તેણી તેના કુટુંબની મિલકતના મહત્તમ 50 ટકા વારસામાં મેળવી શકે છે, જ્યારે બાકીની મિલકત પુરૂષ સંબંધીને આપવામાં આવે છે.
આ પહેલા સફિયાએ કહ્યું હતું કે તેણે ઈસ્લામ છોડી દીધો છે કારણ કે ધર્મના નિયમો અને પરંપરાઓ મહિલાઓ વિરુદ્ધ છે. તેમણે કહ્યું હતું કે, “આવા નિર્ણય પછી પણ ઇસ્લામ મને મારી પોતાની મિલકતનો વારસો મેળવવામાં અવરોધ કરી રહ્યો છે. આનો ઉકેલ શોધવાની જરૂર છે.”
સફિયા કેરળ સ્થિત લોજિકલ સંસ્થા એક્સ-મુસ્લિમ ગ્રુપની જનરલ સેક્રેટરી છે, જેનું સત્તાવાર રીતે 2020માં નોંધણી કરવામાં આવી હતી. આ વર્ષે એપ્રિલમાં સુપ્રીમ કોર્ટે સફિયાની અરજીને મહત્વની ગણાવી હતી અને એટર્ની જનરલને તેની મદદ માટે વકીલની નિમણૂક કરવા કહ્યું હતું.
