નવી દિલ્હીઃ પ્રધાનમંત્રી નરેન્દ્ર મોદીની અધ્યક્ષતામાં કેબિનેટ કમિટી ઓન ઈકોનોમિક અફેર્સ (CCEA) એ 6,798 કરોડ રૂપિયાના અંદાજિત ખર્ચ સાથે રેલવે મંત્રાલયના બે પ્રોજેક્ટને મંજૂરી આપી હતી. આ પ્રોજેક્ટ્સ આંધ્રપ્રદેશ, તેલંગાણા અને બિહારના 8 જિલ્લાઓને આવરી લેશે. આ પ્રોજેક્ટ્સ આગામી પાંચ વર્ષમાં પૂર્ણ કરવામાં આવશે.
- રેલ્વે લાઇનને ડબલ કરવાના મોટા પ્રોજેક્ટને મંજૂરી
માહિતી અને પ્રસારણ મંત્રી અશ્વિની વૈષ્ણવે નવી દિલ્હીમાં નેશનલ મીડિયા સેન્ટર ખાતે પ્રેસ કોન્ફરન્સમાં કેન્દ્રીય કેબિનેટના નિર્ણયોની જાણકારી આપી. તેમણે માહિતી આપી હતી કે ઉત્તર બિહારને રેલવે ઈન્ફ્રાસ્ટ્રક્ચર અને ઉત્તર-પૂર્વના રાજ્યોને વ્યૂહાત્મક જોડાણ પ્રદાન કરવા માટે નરકટિયાગંજ-રક્સૌલ-સીતામઢી-દરભંગા અને સીતામઢી-મુઝફ્ફરપુર રેલ્વે લાઇનને બમણી કરવાની એક મોટી યોજનાને આજે મંજૂરી આપવામાં આવી છે.
- ઉત્તર પ્રદેશ અને ઉત્તર બિહારને ફાયદો થશે
તેમણે કહ્યું કે 4553 કરોડ રૂપિયાના ખર્ચે 256 કિલોમીટરની રેલ્વે લાઇનને બમણી કરવાથી ઉત્તર પ્રદેશ અને ઉત્તર બિહારને ફાયદો થશે. આ સિવાય કેબિનેટે એરુપાલેમ અને નામ્બુરુ વાયા અમરાવતી વચ્ચે 57 કિલોમીટર લાંબી નવી રેલ્વે લાઇનના નિર્માણને મંજૂરી આપી છે.
- નવી રેલ લાઇન પ્રોજેક્ટ સાથે અમરાવતીને સીધી કનેક્ટિવિટી મળશે
નવી રેલ લાઇન પ્રોજેક્ટ એરુપાલેમ-અમરાવતી-નામ્બુરુ એનટીઆર વિજયવાડા અને આંધ્રપ્રદેશના ગુંટુર જિલ્લાઓ અને તેલંગાણાના ખમ્મમ જિલ્લામાંથી પસાર થશે. નવી લાઇન આંધ્ર પ્રદેશની સૂચિત રાજધાની અમરાવતીને સીધી કનેક્ટિવિટી પૂરી પાડશે.
- આંધ્રપ્રદેશ, તેલંગાણા અને બિહારના 8 જિલ્લાઓને આવરી લેવામાં આવશે
આંધ્રપ્રદેશ, તેલંગાણા અને બિહારના 8 જિલ્લાઓને આવરી લેતા બે પ્રોજેક્ટ ભારતીય રેલ્વેના વર્તમાન નેટવર્કમાં લગભગ 313 કિલોમીટરનો ઉમેરો કરશે. નવી લાઇન પ્રોજેક્ટ 9 નવા સ્ટેશનો સાથે લગભગ 168 ગામો અને લગભગ 12 લાખની વસ્તીને કનેક્ટિવિટી પ્રદાન કરશે. મલ્ટિ-ટ્રેકિંગ પ્રોજેક્ટ બે મહત્વાકાંક્ષી જિલ્લાઓ (સીતામઢી અને મુઝફ્ફરપુર)માં કનેક્ટિવિટી વધારશે, જે લગભગ 388 ગામડાઓ અને અંદાજે 9 લાખ વસ્તીને સેવા આપશે.
