સ્પેનના PM સાંચેઝે ગણેશની મૂર્તિ ખરીદી, UPI દ્વારા ચૂકવણી
સ્પેનના પીએમ પેડ્રો સાંચેઝે કહ્યું કે તેઓ ભારત અને યુરોપિયન યુનિયન વચ્ચે મુક્ત વેપાર કરાર (FTA) પર વાટાઘાટોને આગળ વધારવા આતુર છે. તેમણે કહ્યું કે ભારત અને સ્પેન સહિત 27 દેશોના સંગઠન યુરોપિયન યુનિયન વચ્ચે મજબૂત સંબંધોની વિશાળ સંભાવના છે.
યુરોપિયન યુનિયન (EU)-ભારતે બે પ્રદેશો વચ્ચે દ્વિપક્ષીય વેપાર અને રોકાણને વધુ પ્રોત્સાહન આપવાના ઉદ્દેશ્ય સાથે FTAનો પ્રસ્તાવ મૂક્યો હતો. બંને પક્ષો FTA, રોકાણ સંરક્ષણ સંધિ અને ભૌગોલિક સંકેતો (GI) પર કરારો પર વાટાઘાટો કરી રહ્યા છે.
મંગળવારે મુંબઈમાં CII સ્પેન ઈન્ડિયા બિઝનેસ સમિટને સંબોધતા સંચેઝે જણાવ્યું હતું કે ભારત અને EU વચ્ચે મજબૂત સંબંધોની સંભાવનાઓ વિશાળ છે. સ્પેન વિશ્વની સૌથી મોટી અર્થવ્યવસ્થાઓમાંની એક છે અને તેણે ભારતમાં $4.2 બિલિયનનું રોકાણ કર્યું છે. બે પ્રદેશો વચ્ચેનો FTA અમારા બજારોના કદ અને વિવિધતા વધારવામાં મદદ કરશે. પીએમ સાંચેઝની આ પ્રથમ ભારત મુલાકાત છે.
સાંચેઝે ગણેશ મૂર્તિ ખરીદી અને UPI દ્વારા ચૂકવણી કરી
સ્પેનના વડા પ્રધાન પેડ્રો સાંચેઝે મંગળવારે મુંબઈમાં ભગવાન ગણેશની મૂર્તિ ખરીદી હતી. આ માટે તેણે યુનિફાઈડ પેમેન્ટ ઈન્ટરફેસ (UPI) નો ઉપયોગ કર્યો. સંચેઝે આ સરળ વ્યવહાર બાદ UPIની પ્રશંસા કરી હતી.
