વિરાટ કોહલી અને બાબર આઝમ એક જ ટીમ વતી ક્રિકેટ રમતા જોવા મળે તેવી શકયતા
લગભગ બે દાયકાના અંતરાલ પછી, આફ્રો-એશિયા કપ ફરી શરૂ કરવાની યોજના બનાવવામાં આવી રહી છે, જેમાં એશિયા XI અને આફ્રિકા XI વચ્ચે સફેદ બોલની મેચો રમાશે. આફ્રિકન ક્રિકેટ એસોસિએશન (ACA) એ તેની વાર્ષિક કોન્ફરન્સમાં ટૂર્નામેન્ટ ફરી શરૂ કરવા અંગે ચર્ચા કરી હતી, જેમાં છ સભ્યોની વચગાળાની સમિતિની પણ રચના કરવામાં આવી હતી. સમિતિનો ઉદ્દેશ્ય ACA ને મજબૂત કરવાનો અને આંતરરાષ્ટ્રીય સ્તરે આફ્રિકન ખેલાડીઓ માટે વધુ સ્પર્ધાત્મક તકો ઊભી કરવાનો છે. જો આ ટુર્નામેન્ટ ફરીથી થાય છે, તો તે ભારતીય અને પાકિસ્તાની ખેલાડીઓને એક જ ટીમમાં રમતા જોવાની દુર્લભ તક પૂરી પાડશે. જેઓ હાલમાં માત્ર ICC ટૂર્નામેન્ટમાં જ એકબીજા સામે રમે છે
ACAના વચગાળાના પ્રમુખ અને ઝિમ્બાબ્વે ક્રિકેટના અધ્યક્ષ તાવેન્ગા મુખ્લાનીએ જણાવ્યું હતું કે, “આફ્રો-એશિયા કપ માત્ર રમત માટે જ નહીં પણ આર્થિક દૃષ્ટિકોણથી પણ મહત્વપૂર્ણ છે. બંને ખંડોના ખેલાડીઓ અને દર્શકોમાં જબરદસ્ત ઉત્સાહ છે.” જો કે હજુ સુધી એશિયન ક્રિકેટ કાઉન્સિલ (એસીસી) તરફથી આ ઈવેન્ટ અંગે કોઈ સત્તાવાર પ્રતિક્રિયા આપવામાં આવી નથી, પરંતુ એવી પ્રબળ સંભાવના છે કે ટુર્નામેન્ટ ફરી શરૂ થઈ શકે છે.
આફ્રો-એશિયા કપ અત્યાર સુધીમાં માત્ર બે વખત રમાયો છે, 2005માં દક્ષિણ આફ્રિકામાં અને 2007માં ભારતમાં. 2005ના આફ્રો-એશિયા કપમાં ત્રણ મેચની ODI શ્રેણી રમાઈ હતી, જેમાં એક મેચ વરસાદને કારણે રદ કરવામાં આવી હતી અને બાકીની મેચો બાદ શ્રેણી 1-1થી બરાબર થઈ હતી. જ્યારે 2007ની ટુર્નામેન્ટમાં એશિયા ઈલેવન ત્રણેય મેચ જીતી હતી. હવે લગભગ વીસ વર્ષ બાદ ફરી એકવાર આ અંગે ગંભીરતાથી વિચારણા કરવામાં આવી રહી છે.
