બંગાળની ભયાનક ‘સંદેશખાલી’ ઘટના પર બનશે ફિલ્મ, મોટા પડદા પર પીડિતોની પીડા જોવા મળશે
મુંબઈઃ આંતરરાષ્ટ્રીય મહિલા દિવસના અવસર પર, પરીન મલ્ટીમીડિયાએ દેશને હચમચાવી નાખનાર બંગાળમાં બનેલી ભયાનક ઘટના ‘સંદેશખાલી’ પર ફિલ્મ બનાવવાની જાહેરાત કરી છે. એક વીડિયો જાહેર કરીને ફિલ્મ સાથે સંબંધિત માહિતી સત્તાવાર રીતે દર્શકો સાથે શેર કરવામાં આવી હતી. અમિતાભ સિંહ અને ઈશાન બાજપેયી દ્વારા લખાયેલી આ ફિલ્મ 2025માં રિલીઝ થશે. ફિલ્મનું નિર્દેશન સૌરભ તિવારી કરી રહ્યા છે. સત્ય ઘટના પર આધારિત આ ફિલ્મની જાહેરાત થઈ ત્યારથી જ તેને લઈને ચર્ચાનો માહોલ છે.
બંગાળના સંદેશખાલીની ઘણી મહિલાઓએ એક નેતા પર તેમની જમીન પર કબજો અને યૌન શોષણના ગંભીર આરોપ લગાવ્યા હતા, જેના કારણે સંદેશખાલીમાં ભારે હોબાળો થયો હતો. આ પછી આ મુદ્દાઓને લઈને રાજકીય માહોલ પણ ગરમાયો હતો અને ઘણા નેતાઓએ તેના પર પોતાની પ્રતિક્રિયા આપી હતી, હવે આ ફિલ્મ દ્વારા આ પીડિતોની પીડા અને ન્યાય માટેના સંઘર્ષને સ્ક્રીન પર બતાવવામાં આવશે.
સંદેશખાલી પહેલા પણ આવી અનેક સત્ય ઘટનાઓ પર આધારિત ફિલ્મો હિન્દી સિનેમામાં બની છે, જેને દર્શકોએ ખૂબ પસંદ કરી હતી અને આ ફિલ્મોએ બોક્સ ઓફિસ પર જબરદસ્ત સફળતા મેળવી હતી. આ યાદીમાં ‘ધ કાશ્મીર ફાઇલ્સ’ની ગણતરી સૌથી સફળ ફિલ્મોમાં થાય છે. આ ફિલ્મમાં કાશ્મીરી પંડિતોની હિજરત અને તેમની સામે થયેલા જઘન્ય ગુનાઓ દર્શાવવામાં આવ્યા છે. આ ફિલ્મનું નિર્દેશન વિકાસ અગ્નિહોત્રીએ કર્યું હતું.
