નવી દિલ્હીઃ ઈન્ડિયન પ્રીમિયર લીગની જેમ પાકિસ્તાનમાં શરૂ થયેલી પાકિસ્તાન સુપર લીગની આગામી સિઝન 17 ફેબ્રુઆરીથી શરૂ થઈ રહી છે. જો કે, આ પહેલા લીગને મોટા આંચકાઓનો સામનો કરવો પડી રહ્યો છે. વાસ્તવમાં, વિશ્વભરના ઘણા વિદેશી ખેલાડીઓ PSL 2024માંથી તેમના નામ પાછા ખેંચી રહ્યા છે. આ વખતે આ લીગમાં ઘણા મોટા ક્રિકેટરો ભાગ લે તેવી શકયતાઓ નહીવંત છે.
સમગ્ર વિશ્વમાં એકસાથે ચાલતી બહુવિધ ફ્રેન્ચાઇઝી લીગને કારણે, કેટલાક ક્રિકેટ બોર્ડે તેમના ખેલાડીઓને અન્ય દેશોની સ્થાનિક T20 મેચોમાં ભાગ લેવાની મંજૂરી આપવાનો ઇનકાર કર્યો હતો, જેના કારણે ઘણા મોટા આંતરરાષ્ટ્રીય ક્રિકેટરોને પાકિસ્તાન સુપર લીગ (PSL)માંથી ખસી જવાની ફરજ પડી હતી.
PSL 17 ફેબ્રુઆરીથી લાહોરમાં શરૂ થઈ રહી છે અને તમામ છ ફ્રેન્ચાઇઝી ટીમોને ભારે નુકસાન થયું છે અને ઘણા ખેલાડીઓએ ‘બાંગ્લાદેશ પ્રીમિયર લીગ’, ‘ILT20’ અને ‘SA20’ લીગ પસંદ કરી છે. PSL ટીમ મુલ્તાન સુલ્તાનને ઘણા મહત્વના ખેલાડીઓનું સમર્થન નહીં મળે. આમાં ઈંગ્લેન્ડનો ફાસ્ટ બોલર રીસ ટોપલી ઈજાના કારણે ટુર્નામેન્ટમાંથી બહાર થનારો તાજેતરનો ખેલાડી છે.
ઈંગ્લેન્ડ એન્ડ વેલ્સ ક્રિકેટ બોર્ડ (ECB) એ પણ કહ્યું કે, તેણે પીએસએલમાં રમવા માટે ટોપલીને નો ઓબ્જેક્શન સર્ટિફિકેટ (NOC) જારી કર્યું નથી. કેટલાક અન્ય બોર્ડ પણ PSL માટે નો ઓબ્જેક્શન સર્ટિફિકેટ આપવા પર પુનર્વિચાર કરી રહ્યા છે.
જ્યારે પેશાવર ઝાલ્મીને દક્ષિણ આફ્રિકાની લુંગી એનગિડીની સેવાઓ નહીં મળે, તો ક્વેટા ગ્લેડીયેટર્સને શ્રીલંકાના વાનિન્દુ હસરાંગા વિના મેદાનમાં ઉતરવું પડશે. વેસ્ટ ઈન્ડિઝના ક્રિકેટર શાઈ હોપ, મેથ્યુ ફોર્ડ અને અકીલ હુસૈન સાથે દક્ષિણ આફ્રિકાના તબરાઈઝ શમશી અને રસી વાન ડેર ડુસેન પણ પીએસએલની આગામી સિઝનમાં નહીં રમે. ઈંગ્લેન્ડના જેમ્સ વિન્સ અને અફઘાનિસ્તાનના નૂર અહેમદ અને નવીન ઉલ હક પણ આખી ટૂર્નામેન્ટમાંથી બહાર થઈ જશે.
PSL ફ્રેન્ચાઇઝીના માલિકે પાકિસ્તાન ક્રિકેટ બોર્ડ (PCB) ને ટૂર્નામેન્ટ વિન્ડો પર પુનર્વિચાર કરવા વિનંતી કરી છે. તેમણે ગોપનીયતાની શરતે કહ્યું કે, ‘SA20’ તાજેતરમાં પૂર્ણ થયું હતું અને ‘ILT20’ જે દિવસે ‘PSL’ શરૂ થશે તે દિવસે સમાપ્ત થશે, તેથી હવે મોટા ખેલાડીઓ સાથે કરાર કરવા મુશ્કેલ બની રહ્યા છે.
તેમણે કહ્યું કે, જાન્યુઆરી-ફેબ્રુઆરી આંતરરાષ્ટ્રીય ક્રિકેટ શ્રેણી માટે વ્યસ્ત મોસમ છે. શ્રીલંકા અફઘાનિસ્તાન સામે શ્રેણી રમી રહ્યું છે, દક્ષિણ આફ્રિકા ન્યુઝીલેન્ડ સામે બે ટેસ્ટ મેચની શ્રેણી રમી રહ્યું છે જ્યારે વેસ્ટ ઈન્ડિઝ ઓસ્ટ્રેલિયા સામે શ્રેણી રમી રહ્યું છે. તેણે કહ્યું, પીએસએલ વિન્ડો બદલવાની ખૂબ જ જરૂર છે. જો આમ નહીં થાય તો અમે મોટા વિદેશી ખેલાડીઓ સાથે કરાર કરી શકીશું નહીં અને આ લીગનું આકર્ષણ જતું રહેશે.