ઉતાર-ચઢાવ પછી શેરબજાર લાલ નિશાન ઉપર બંધ રહ્યું

મુંબઈઃ વિદેશી મૂડીની સતત ઉપાડ વચ્ચે ઓટો, ફાર્મા અને કેપિટલ ગુડ્ઝ કંપનીઓના શેરમાં પ્રોફિટ-બુકિંગના કારણે બુધવારે સતત ત્રીજા દિવસે શેરબજારો ઘટ્યા હતા. અસ્થિર સત્રમાં, બેન્ચમાર્ક BSE સેન્સેક્સ 138.74 પોઈન્ટ અથવા 0.17 ટકા ઘટીને 80,081.98 પર બંધ થયો હતો, જ્યારે તેના 22 ઘટક શેરોમાં ઘટાડો થયો હતો. ટ્રેડિંગ દરમિયાન બેન્ચમાર્ક 80,000 પોઈન્ટથી નીચે ગયો અને 79,891.68 પોઈન્ટને સ્પર્શ્યો હતો.

NSE નિફ્ટી 36.60 પોઈન્ટ અથવા 0.15 ટકાના ઘટાડા સાથે 24,435.50 પર બંધ રહ્યો હતો. સેન્સેક્સના 30 શેરોમાં મહિન્દ્રા એન્ડ મહિન્દ્રા, સન ફાર્મા, પાવર ગ્રીડ, એનટીપીસી, અદાણી પોર્ટ્સ, લાર્સન એન્ડ ટુબ્રો, આઈસીઆઈસીઆઈ બેંક અને ટાઇટનમાં સૌથી વધુ ઘટાડો નોંધાયો હતો. બજાજ ફાઇનાન્સનો શેર લગભગ 5 ટકા વધ્યો હતો. કંપનીએ જણાવ્યું હતું કે, સપ્ટેમ્બર 2024 ના રોજ પૂરા થતા બીજા ક્વાર્ટરમાં તેનો એકીકૃત ચોખ્ખો નફો 13 ટકા વધીને રૂ. 4,014 કરોડ થયો છે.

ટેક મહિન્દ્રા, ટાટા કન્સલ્ટન્સી સર્વિસ, એચડીએફસી બેંક, એચસીએલ ટેક્નોલોજીસ અને બજાજ ફિનસર્વ અન્ય મોટા ગેનર્સમાં હતા. એક્સચેન્જ ડેટા અનુસાર, વિદેશી સંસ્થાકીય રોકાણકારો (FII) એ મંગળવારે રૂ. 3,978.61 કરોડના શેરનું વેચાણ કર્યું હતું, જ્યારે સ્થાનિક સંસ્થાકીય રોકાણકારો (DII) એ રૂ. 5,869.06 કરોડના શેર ખરીદ્યા હતા.