અમેરિકાઃ કમલા હેરિસને પૂર્વ રાષ્ટ્રપતિ ઓબામા અને તેમના પત્ની મિશેલે આપ્યું સમર્થન
નવી દિલ્હીઃ અમેરિકાના પૂર્વ રાષ્ટ્રપતિ બરાક ઓબામા અને તેમની પત્ની મિશેલે શુક્રવારે કમલા હેરિસની રાષ્ટ્રપતિ પદની ઉમેદવારીને સમર્થન આપ્યું હતું. લગભગ એક મિનિટના લાંબા વીડિયોમાં બંનેએ કમલા હેરિસ વચ્ચેના ખાનગી ફોન કોલનો પણ ઉલ્લેખ કર્યો હતો. ઓબામાએ હેરિસને કહ્યું, “મિશેલ અને મેં તમને એ જણાવવા માટે ફોન કર્યો કે અમને આપને ટેકો આપવા માટે ગર્વ છે, અમે તમને આ ચૂંટણી જીતવા અને તમને ઓવલ ઓફિસમાં લાવવામાં મદદ કરવા માટે બનતું બધું કરી શકીએ છીએ.” ભૂતપૂર્વ પ્રથમ મહિલાએ હેરિસને કહ્યું કે, મને તારા પર ગર્વ છે. આ ઐતિહાસિક બનવા જઈ રહ્યું છે.
ફોન પર વાત કરતા, હેરિસે સમર્થન અને તેમની લાંબી મિત્રતા માટે આભાર વ્યક્ત કર્યો હતો. તેમણે કહ્યું કે, બંનેનો આભાર. આ મારા માટે ખુબ મહત્વનું છે. અમે આ સાથે કંઈક સારું કરવા જઈ રહ્યા છીએ. ચૂંટણી પ્રચારમાં લાગેલી ટીમે કહ્યું કે, આ ખરેખર એક કોલ હતો. આ અગાઉ સુનિશ્ચિત કાર્યક્રમ ન હતો. વાસ્તવમાં, પ્રમુખ જો બિડેન રેસમાંથી બહાર થયાના એક અઠવાડિયાથી ઓછા સમયમાં, હેરિસની વધતી લોકપ્રિયતા ચૂંટણીને રોમાંચક બનાવી રહી છે. આનાથી રિપબ્લિકન હરીફ ડોનાલ્ડ ટ્રમ્પ સામે તેમનો પડકાર મજબૂત થશે. ઓબામા યુનાઇટેડ સ્ટેટ્સના પ્રથમ અશ્વેત રાષ્ટ્રપતિ હતા અને ડેમોક્રેટિક પાર્ટીના સૌથી લોકપ્રિય વ્યક્તિઓમાંના એક છે.
અત્રે ઉલ્લેખનીય છે કે, આગામી નવેમ્બર મહિનામાં અમેરિકામાં રાષ્ટ્રપતિ પદ માટે ચૂંટણી યોજાવાની છે, જેને લઈને હાલ જોરશોરથી પ્રચાર કરવામાં આવી રહ્યો છે.
