NCPમાં પક્ષના નામ અને ચૂંટણી ચિન્હની લડાઈ વચ્ચે હવે કાકા-ભત્રીજા વચ્ચે પોસ્ટર વોર શરૂ થયું
મુંબઈઃ મહારાષ્ટ્રમાં રાષ્ટ્રવાદી કોંગ્રેસ પાર્ટી (NCP)ને લઈને રાજકીય યુદ્ધ ચાલી રહ્યું છે. NCP નેતા અજિત પવારના બળવાખોર વલણે મહારાષ્ટ્રના રાજકારણમાં ખળભળાટ મચાવી દીધો છે. કાકા અને ભત્રીજાની લડાઈ વચ્ચે હવે પોસ્ટર વોર શરૂ થઈ ગયું છે. દિલ્હીમાં વિવિધ સ્થળોએ જૂના પોસ્ટરોની જગ્યાએ નવા પોસ્ટરો લગાવવામાં આવી રહ્યા છે. ક્યાંક દ્રોહી છે તો ક્યાંક સત્ય માટે લડતા બેનરો છે.
અજિત પવારે બળવો કરીને કાકા શરદ પવારથી અલગ થઈ ગયા છે. દરમિયાન પાર્ટીના નામ અને પ્રતીકને લઈને બંને નેતાઓ વચ્ચે રાજકીય લડાઈ ચાલી રહી છે. આ તમામ અટકળો વચ્ચે એનસીપી પ્રમુખ શરદ પવાર પાર્ટીની રાષ્ટ્રીય કાર્યકારિણીની બેઠક માટે દિલ્હી જઈ રહ્યા છે. તેમના આગમન પહેલા જ રાજધાનીના રાજકીય મહોલ્લાઓમાં રાજકીય ગરમાવો જોવા મળી રહ્યો છે.
NCPના જૂના પોસ્ટર્સ અને હોર્ડિંગ્સ, જેના પર અજિત પવાર અને પ્રફુલ પટેલ જોવા મળતા હતા. આ જૂના પોસ્ટર્સ અને હોર્ડિંગ્સ દિલ્હીમાં પાર્ટી કાર્યાલયની બહારથી હટાવવામાં આવી રહ્યા છે. તેમજ નવા પોસ્ટર લગાવવામાં આવી રહ્યા છે, જેના પર ‘ગદ્દાર’ લખેલું છે. એટલું જ નહીં, દિલ્હીમાં શરદ પવારના ઘરની બહાર નવા પોસ્ટર પણ લગાવવામાં આવ્યા છે. જેમાં લખ્યું છે કે, ‘સત્ય અને અસત્યની લડાઈમાં આખો દેશ શરદ પવારની સાથે છે. ભારતનો ઈતિહાસ એવો છે કે તેણે દગો કરનારાઓને ક્યારેય માફ કર્યા નથી. રાષ્ટ્રવાદી વિદ્યાર્થી કોંગ્રેસે પણ ફિલ્મ ‘બાહુબલી’ના એક દ્રશ્ય પર આધારિત પોસ્ટર લગાવ્યું છે. આમાં ‘કટપ્પા’ ‘અમરેન્દ્ર બાહુબલી’ની પીઠમાં છરો મારતો બતાવવામાં આવ્યો છે.
