અમિત શાહે મહારાષ્ટ્રના સહકારી અભિયાનના વખાણ કર્યા,નવી નીતિ ટૂંક સમયમાં આવવાની જાહેરાત 

દિલ્હી: કેન્દ્રીય ગૃહ અને સહકાર મંત્રી અમિત શાહે સેન્ટ્રલ રજિસ્ટ્રાર ઑફ કોઓપરેટિવ સોસાયટીઝ (CRCS) ઑફિસનું ડિજિટલ પ્લેટફોર્મ લોન્ચ કર્યું અને રાજ્યમાં સહકારી ચળવળની તાકાતની પ્રશંસા કરી. તેમણે કહ્યું કે મહારાષ્ટ્રમાં એક પણ સુગર મિલ એવી ન હોવી જોઈએ જે ઈથેનોલનું ઉત્પાદન ન કરતી હોય. ડિજિટલ પ્લેટફોર્મ લોન્ચ કર્યા પછી એક જાહેર કાર્યક્રમને સંબોધતા શાહે કહ્યું કે નેશનલ કોઓપરેટિવ ડેટાબેઝ બનાવવાનું 95 ટકા કામ પૂર્ણ થઈ ગયું છે. તેમણે કહ્યું કે આ માટે કેન્દ્ર ટૂંક સમયમાં નવી સહકારી નીતિ લાવશે.

શાહે કહ્યું, “સહકારી સંસ્થાઓ માટે વિવિધ યોજનાઓ હેઠળ વિશાળ ભંડોળ ઉપલબ્ધ છે, જેનો ઉપયોગ ડિસ્ટિલરી સ્થાપવા માટે કરી શકાય છે. રાજ્યની સુગર મિલોએ લોનની સુવિધાનો લાભ લેવો જોઈએ. મહારાષ્ટ્રમાં એક પણ સુગર મિલ એવી ન હોવી જોઈએ જે ઇથેનોલનું ઉત્પાદન કરતી ન હોય. આ એક ઉભરતું બજાર છે અને તેના માટે દરો પણ સારા છે. આધુનિકીકરણ, પારદર્શિતા અને જવાબદારી વિના સહકારી ક્ષેત્ર આગળ વધી શકતું નથી.

આ કાર્યક્રમમાં મહારાષ્ટ્રના નાયબ મુખ્યમંત્રી અજિત પવાર પણ હાજર રહ્યા હતા. શાહે કહ્યું, “અજિત પવાર સાથેનો આ મારો પહેલો જાહેર કાર્યક્રમ છે. હું તેને કહેવા માંગુ છું કે તે લાંબા સમય પછી યોગ્ય જગ્યાએ છે. તમારા માટે આ હંમેશા યોગ્ય જગ્યા હતી, પરંતુ તમે અહીં બહુ મોડેથી આવ્યા હતા.” અજિત પવાર ગયા મહિને જ મહારાષ્ટ્રના મુખ્ય પ્રધાન એકનાથ શિંદે અને ભારતીય જનતા પાર્ટી (BJP)ની સરકારમાં જોડાયા હતા. આ કાર્યક્રમમાં મુખ્યમંત્રી એકનાથ શિંદે અને નાયબ મુખ્યમંત્રી દેવેન્દ્ર ફડણવીસ પણ હાજર રહ્યા હતા.