સાઉદીથી હૈદરાબાદ આવી રહેલી ઈન્ડિગોની ફ્લાઈટમાં ઈમરજન્સી,પાકિસ્તાનમાં થયું લેન્ડિંગ
- ઈન્ડિગોની ફ્લાઈટમાં ઈમરજન્સી
- સાઉદીથી હૈદરાબાદ આવી રહી હતી
- પાકિસ્તાનમાં થયું લેન્ડિંગ
દિલ્હી: ઈન્ડિગોના વિમાનોમાં ટેકનિકલ સમસ્યાઓના કારણે ઘણી વખત ઈમરજન્સી લેન્ડિંગ કરવું પડે છે. જોકે, આ વખતે પ્લેનમાં મેડિકલ ઈમરજન્સીનો સામનો કરવો પડ્યો છે. ઈન્ડિગો એરલાઈન કંપનીએ માહિતી આપી છે કે સાઉદી અરેબિયાના જેદ્દાથી હૈદરાબાદ જઈ રહેલી ઈન્ડિગો ફ્લાઈટ 6E 68માં મેડિકલ ઈમરજન્સીના કારણે પ્લેનને પાકિસ્તાનના કરાચીમાં લેન્ડ કરવું પડ્યું હતું. તો ચાલો જાણીએ આ આખો મામલો
શું છે સમગ્ર મામલો?
ખરેખર, જ્યારે ઈન્ડિગો નું વિમાન જેદ્દાથી હૈદરાબાદ આવી રહ્યું હતું ત્યારે એક મુસાફરની તબિયત લથડી હતી. મેડિકલ ઈમરજન્સી જોઈને પ્લેનના કેપ્ટને ફ્લાઈટને કરાચી તરફ ડાયવર્ટ કરી. આ પછી જરૂરી ઔપચારિકતાઓ પૂર્ણ કર્યા પછી વિમાને પાકિસ્તાનના કરાચીથી ઉડાન ભરી અને ભારતના હૈદરાબાદમાં ઉતરાણ કર્યું.
મુસાફર બચી શક્યો ન હતો
ઈન્ડિગો એરલાઈન કંપની દ્વારા આપવામાં આવેલી માહિતી અનુસાર, પ્લેનમાં જે મુસાફરની તબિયત બગડી હતી તે પાકિસ્તાનના કરાચીમાં ઉતર્યા બાદ ડોક્ટરોએ તેની કાળજી લીધી હતી. જોકે, કમનસીબે મુસાફર બચી શક્યો ન હતો અને વિમાનના આગમન પર તેને મૃત જાહેર કરવામાં આવ્યો હતો.
