અમેરિકાઃ ChatGPT બનાવતી કંપની સામે ખોટી માહિતી પ્રદાન કરવા બદલ તપાસ શરૂ કરાઈ
વોશિંગ્ટનઃ યુએસ ફેડરલ ટ્રેડ કમિશન (FTC) એ ગ્રાહક સુરક્ષા નિયમોનું ઉલ્લંઘન કરવા અને ખોટી માહિતી પ્રદાન કરવા બદલ ChatGPT વિકસાવનાર કંપની સામે તપાસ શરૂ કરી છે. OpenAI એ ગયા વર્ષે ChatGPT, આર્ટિફિશિયલ ઇન્ટેલિજન્સ (AI) પર આધારિત મોડલ રજૂ કર્યું હતું. ત્યારથી, આ ચેટબોટ લોકોમાં સતત ચર્ચાનો વિષય છે. જો કે, આ દરમિયાન ChatGPT પર જાહેર કરવામાં આવેલી કેટલીક માહિતીને લઈને પણ સવાલો ઉભા થયા છે. દરમિયાન, FTC એ ChatGPT ના નિર્માતા OpenAI ને 20 પાનાની નોટિસ મોકલી છે, જેમાં તેને સંખ્યાબંધ મુદ્દાઓ પર જવાબ આપવા જણાવ્યું છે. નોટિસમાં AI ટેક્નોલોજી, ઉત્પાદનો, ગ્રાહકો, ગોપનીયતા સુરક્ષા અને ડેટા સુરક્ષા જોગવાઈઓ પર વિગતવાર માહિતી માંગવામાં આવી હતી. એફટીસીના પ્રવક્તાએ ઓપનએઆઈ સામે તપાસ મામલે ટિપ્પણી કરવાનું ટાળ્યું હતું.
અમેરિકન અખબાર ‘ધ વોશિંગ્ટન પોસ્ટ‘માં પ્રકાશિત અહેવાલ અનુસાર, FTC તપાસ કરી રહ્યું છે કે શું OpenAI ગોપનીયતા અથવા ડેટા સુરક્ષા માટે અયોગ્ય અથવા ભ્રામક પ્રથાઓ અપનાવી રહી છે અથવા ગ્રાહકોના હિતોને નુકસાન પહોંચાડી રહી છે. જ્યારે તપાસના અહેવાલો સામે આવ્યા ત્યારે ઓપનએઆઈના સ્થાપકે એક ટ્વીટમાં તેમની નિરાશા વ્યક્ત કરી હતી. આ પગલું વિશ્વાસ વધારવામાં મદદ કરશે નહીં પરંતુ કંપની ટ્રેડ કમિશન સાથે મળીને કામ કરશે, એમ તેમણે ઉમેર્યું. તેમણે ટ્વિટમાં કહ્યું હતું કે, “અમારા માટે એ મહત્વનું છે કે ટેક્નોલોજી ગ્રાહકો માટે સલામત અને મૈત્રીપૂર્ણ છે અને અમે ખાતરી કરીએ છીએ કે અમે કાયદાનું પાલન કરીએ છીએ. અમે વપરાશકર્તાની ગોપનીયતાનું રક્ષણ કરીએ છીએ અને વિશ્વ વિશે જાણવા માટે અમારી સિસ્ટમ બનાવી છે, ખાનગી વ્યક્તિઓ માટે નહીં.” અગાઉ મે મહિનામાં ઓલ્ટમેન યુએસ કોંગ્રેસ સમક્ષ હાજર થયા હતા. આ ઉપરાંત, તેમણે યુરોપિયન દેશો અને ભારતનો પ્રવાસ પણ કર્યો છે અને AI પર નિયમનની હિમાયત કરી છે. વાસ્તવમાં, ChatGPT અને કેટલાક અન્ય AI સોલ્યુશન્સનો ઝડપથી વધી રહેલા ઉપયોગ અને તેના સંભવિત જોખમો વિશે સતત અવાજ ઉઠાવવામાં આવ્યો છે.
