અમદાવાદઃ રાજ્યમાં GSTનું મોટું કૌભાંડ ભાવનગરમાં પકડાયું હતું. ત્યારે ભાવનગરના માધવ કોપરના 700 કરોડના GST કૌભાંડમાં સંડોવાયેલા નયન નટુભાઈ પટેલની સામે ગુનો દાખલ થયા બાદ તે ધરપકડ ટાળવા આગોતરા જામીન મેળવવાના પ્રયાસો કરતો હતો.. દરમિયાન તેણે સુપ્રીમ કોર્ટમાંથી ધરપકડ પર સ્ટે મેળવ્યો હતો. અને કોર્ટમાંથી આગોતરા જામીન મેળવવાનો પ્રયાસ કર્યો હતો, પરંતુ તેમાં સફળતા મળી ન હતી. જોકે તેને મળેલા સ્ટેની મુદ્દત શુક્રવારે પૂરી થઈ ગઈ હતી. આરોપીએ ધરપકડથી બચવા જીએસટીના અધિકારીઓ પર કાર ચઢાવવાનો પણ પ્રયાસ કર્યો હતો અને અધિકારીઓને ચકમો આપી ફરાર થઈ ગયો હતો. આરોપીને ગુજરાત ATSના અધિકારીઓએ ઝડપી પાડ્યો હતો.
સૂત્રોના જણાવ્યા મુજબ ભાવનગરમાં પકડાયેલા 700 કરોડના GST કૌભાંડમાં આરોપી નયન પટેલ પોલીસથી બચવા નાસતો-ફરતો હતો. દરમિયાન ATSના અધિકારી ભાવેશ રોજીયાને બાતમી મળી હતી તેના આધારે ગુજરાત ATSના પીઆઈ સંજય પરમારની ટીમ દ્વારા બાતમી સ્થળેથી આરોપીને ઝડપીને વધુ તપાસ માટે અમદાવાદમાં GST વિભાગને સોંપવામાં આવ્યો છે. થોડા દિવસ પહેલાં આરોપી નલિન પટેલ અમદાવાદમાં પાલડી વિસ્તારમાં નારાયણનગર વિસ્તારમાં હોવાની માહિતી GSTને મળતા બે અધિકારીઓ ખાનગી વાહનમાં નલિન પટેલને પકડવા માટે ગયા હતા. જ્યાં તે કારમાં મળી આવ્યો હતો. જોકે નલિન પટેલ કાર લઈ નાસી છૂટ્યો હતો, જેનો GSTના અધિકારીઓએ પીછો કર્યો હતો. દરમિયાન આગળ જતા ટ્રાફિકના કારણે નયન પટેલ રોકાઈ જતા તેને પકડવા જતા તેણે પોતાની કાર રિવર્સમાં લઈ GSTના અધિકારીઓ પર ચઢાવવાનો પ્રયાસ કર્યો હતો અને તેમના વાહનને નુકસાન કરી ફરાર થઈ ગયો હતો.
આ ઘટના અંગે GSTના અધિકારીઓએ પોલીસ ફરિયાદ કરવા માટેની તજવીજ હાથ ધરી હતી. નલિન પટેલે સુપ્રીમ કોર્ટમાંથી ધરપકડ પર સ્ટે મેળવ્યો હતો. જેની મુદ્દત ગત શુક્રવારે પૂરી થઈ હતી. આ અંગેની જાણકારી GST અધિકારીઓને હતી. દરમિયાન નલિન પટેલ અમદાવાદમાં હોવાની પાકી બાતમી મળતા બે અધિકારીઓ તેમની ધરપકડ કરવા માટે ગયા હતા.
સૂત્રોના જણાવ્યા મુજબ જુલાઈ 2021માં સ્ટેટ GST દ્વારા રાજ્યમાં મોટા પાયે સર્ચ સીઝરની કાર્યવાહી કરવામાં આવી હતી. જેમાં માલ અને સેવાના સપ્લાય વિના બીલ બનાવવાનું અને માલ અને સેવાના સપ્લાય વિના બિલ બનાવી તે બીલ પર ટેક્સ ક્રેડિટ લેવામાં આવતી હતી. જેમાં ભાવનગરમાંથી સ્ટેટ GST દ્વારા મોટું કૌભાંડ ઝડપી પાડવામાં આવ્યું હતું. આ કૌભાંડમાં માધવ કોપર.લી ભાવનગરના ચેરમેન નિલેશ પટેલ દ્વારા 762 કરોડનું બીલિંગ કૌભાંડ કરવામાં આવ્યું હતું. સ્ટેટ GST દ્વારા નિલેશ પટેલના ઘરે તથા ઓફિસે સર્ચ ઓપરેશન હાથ ધરવામાં આવ્યું હતું. આ દરમિયાન તે પોતાની ધરપકડ ટાળવા માટે પ્રયત્નો કરતો હતો.
