નવી દિલ્હીઃ પેટ્રોલ અને ડીઝલના સંકટનો સામનો કરી રહેલી બાંગ્લાદેશ સરકારે વીજળી બચાવવા માટે એક નવું પગલું ભર્યું છે. આ અંતર્ગત વડા પ્રધાન શેખ હસીનાની સરકારે દેશભરની શાળાઓ અઠવાડિયામાં એક દિવસને બદલે બે દિવસ બંધ રાખવાનો અને ઓફિસનો સમય એક કલાક ઘટાડવાનો નિર્ણય લીધો છે. દેશમાં ગત મહિનાથી રોજના બે કલાક વીજ કાપ શરૂ કરવામાં આવ્યો છે, છતાં ઘણા ભાગોમાં વીજળી ન હોવાના કારણે ઘણા સમયથી અંધારપટનો સામનો કરવો પડી રહ્યો છે.
પેટ્રોલ અને ડીઝલની અછતને કારણે બાંગ્લાદેશ સરકારે ડીઝલથી ચાલતા તમામ પાવર પ્લાન્ટ પણ બંધ કરવા પડ્યા છે. હકીકતમાં, યુક્રેન પર રશિયાના આક્રમણ પછી આયાતી ઇંધણના વધતા ખર્ચને કારણે દક્ષિણ એશિયાના દેશે ગયા મહિને તેના તમામ 10 ડીઝલ પાવર પ્લાન્ટ બંધ કરી દીધા હતા.
કેબિનેટ સચિવ ખંડકર અનવારુલ ઈસ્લામે પત્રકારોને જણાવ્યું હતું કે, વડા પ્રધાન શેખ હસીનાની સરકારે નિર્ણય લીધો છે કે શાળાઓ હવે અઠવાડિયામાં બે દિવસ બંધ રહેશે. શાળાઓ સામાન્ય રીતે અઠવાડિયામાં છ દિવસ ખુલે છે અને શુક્રવારે બંધ રહે છે, પરંતુ શિક્ષણ મંત્રાલયે જાહેરાત કરી હતી કે તેઓ હવે શનિવારે પણ બંધ રહેશે.
સરકારી એજન્સીઓ સામાન્ય સવારે 9 વાગ્યાને બદલે સવારે 8 વાગ્યાથી ખુલશે અને સાંજે 5 વાગ્યાને બદલે 3 વાગ્યે બંધ થશે. તે જ સમયે, બેંકો હવે સવારે 10 વાગ્યાને બદલે 9 વાગ્યે ખુલશે અને સાંજે 6 વાગ્યાને બદલે 4 વાગ્યે બંધ થશે.
તેમણે કહ્યું કે, સરકાર મધરાતથી સવાર સુધી ગામડાઓમાં સિંચાઈ માટે અવિરત વીજ પુરી પાડશે. આ મહિનાની શરૂઆતમાં, 165 મિલિયન લોકોના દેશમાં વિદ્યાર્થીઓ અને વિરોધ પક્ષોના વિરોધ વચ્ચે સરકારે તેલના ભાવમાં 51.7 ટકા સુધીનો વધારો કર્યો હતો. વીજળી બચાવવા માટે સરકારે ફેક્ટરીઓ માટે સાપ્તાહિક રજા પણ જાહેર કરી છે.
બાંગ્લાદેશનું અર્થતંત્ર સૌથી ઝડપથી વિકસતું અર્થતંત્ર છે, પરંતુ આયાત બિલમાં વધારો થવાને કારણે વિદેશી હૂંડિયામણના ભંડારમાં ઘટાડો થવાને કારણે સરકારને આંતરરાષ્ટ્રીય નાણાકીય ભંડોળ સહિત વૈશ્વિક એજન્સીઓ પાસેથી લોન લેવાની પ્રેરણા મળી છે. સરકારે લક્ઝરી ગુડ્સ અને લિક્વિફાઈડ નેચરલ ગેસની આયાત પર પણ પ્રતિબંધ મૂક્યો છે.
(Photo-File)