બાંગ્લાદેશઃ ચિન્મય કૃષ્ણન દાસની ધરપકડનો વિરોધ કરી રહેલા હિન્દુઓ ઉપર જમાતના કાર્યકરોનો હુમલો
કોલકાતાઃ ઇસ્કોન પુંડરિક ધામના પ્રમુખ ચિન્મય કૃષ્ણન દાસની ભારતના પડોશી દેશ બાંગ્લાદેશના ચિટાગોંગમાં ધરપકડ કરવામાં આવી હતી. ત્યારથી સ્થિતિ વણસી રહી છે. ધરપકડના વિરોધમાં હિન્દુ સમુદાયના લોકો રસ્તા પર ઉતરી આવ્યા છે. આ દરમિયાન BNP અને જમાતના કાર્યકરોએ હિંદુઓ પર હુમલો કર્યો હતો. આ હુમલામાં લગભગ 50 લોકો ઘાયલ થયા છે. મોડી રાત્રે, હજારો હિન્દુઓએ મૌલવી બજારમાં વિશાળ મશાલ રેલી કાઢી, જય સિયા રામ અને હર હર મહાદેવના નારા લગાવ્યા હતા.
સુત્રોના જણાવ્યા અનુસાર, શાહબાગમાં એક મીટિંગ દરમિયાન ચિત્તાગોંગ યુનિવર્સિટીના પ્રોફેસર કુશલ બરન પર પણ હુમલો થયો હતો. ઘણા ઘાયલ દેખાવકારોને હોસ્પિટલમાં દાખલ કરવામાં આવ્યા છે. નવાઈની વાત એ છે કે આ હિંસક ઘટનાઓ દરમિયાન વહીવટીતંત્ર અને પોલીસે કોઈ કાર્યવાહી કરી ન હતી. શાહબાગ હુમલા વખતે પોલીસ અને વહીવટીતંત્ર મૂક પ્રેક્ષક બનીને રહ્યું હતું. સોશિયલ મીડિયા પર સામે આવેલી તસવીરો આ હુમલાઓની ગંભીરતા દર્શાવે છે.
પશ્ચિમ બંગાળ ભાજપના અધ્યક્ષ સુકાંત મજુમદારે આ ઘટનાઓની નિંદા કરી અને ચિન્મય પ્રભુની ધરપકડને અન્યાયી ગણાવી હતી. તેમણે ભારતના વિદેશ મંત્રી ડૉ. એસ. જયશંકરને આ મુદ્દાને ગંભીરતાથી લેવા અને તાત્કાલિક પગલાં લેવા અપીલ કરી હતી. સુકાંત મજુમદારે X (અગાઉના ટ્વિટર) પર લખ્યું હતું કે ચિન્મય પ્રભુ બાંગ્લાદેશમાં હિંદુ લઘુમતીઓના અધિકારો માટે સતત લડી રહ્યા હતા. તેમની ધરપકડ માટે બાંગ્લાદેશ સરકારની આકરી ટીકા થઈ રહી છે.
બાંગ્લાદેશ પોલીસે સોમવારે ઢાકા એરપોર્ટ પરથી ચિન્મય કૃષ્ણ દાસ બ્રહ્મચારીની ધરપકડ કરી હતી. પોલીસ ડિટેક્ટિવ બ્રાન્ચના પ્રવક્તા રેઝાઉલ કરીમના જણાવ્યા અનુસાર, કાયદાકીય પ્રક્રિયા મુજબ ધરપકડ કરવામાં આવી છે. ચિન્મય દાસને આગળની કાર્યવાહી માટે સંબંધિત પોલીસ સ્ટેશનને સોંપવામાં આવ્યા હતા. આ ઘટનાઓએ બાંગ્લાદેશમાં હિન્દુ લઘુમતીઓની સુરક્ષા પર ગંભીર સવાલો ઉભા કર્યા છે. કટ્ટરવાદી જૂથોના હિંસક વલણ અને વહીવટીતંત્રની નિષ્ક્રિયતાએ આંતરરાષ્ટ્રીય સમુદાયનું ધ્યાન ખેંચ્યું છે.
