નવી દિલ્હીઃ ગ્રાહકોને પોષણક્ષમ ભાવે ખાદ્યતેલની ઉપલબ્ધતા સુનિશ્ચિત કરવા કેન્દ્ર સરકારે ખાદ્યતેલો પરની મૂળભૂત આયાત જકાતમાં ઘટાડો કર્યો છે. રિફાઈન્ડ સોયાબીન ઓઈલ અને રિફાઈન્ડ સનફ્લાવર ઓઈલના સંદર્ભમાં ફૂડ એન્ડ પબ્લિક ડિસ્ટ્રિબ્યુશન વિભાગ દ્વારા નોટિફિકેશન નંબર 39/2023 – કસ્ટમ્સ દ્વારા આ અંગેનો આદેશ જારી કરવામાં આવ્યો હતો. પરંતુ આજથી બેઝિક ઈમ્પોર્ટ ડ્યુટી 17.5% થી ઘટાડીને 12.5% કરવામાં આવી છે. આ આદેશ 31 માર્ચ, 2024 સુધી લાગુ રહેશે.
આ નિર્ણયથી સ્થાનિક બજારમાં ખાદ્યતેલોની કિંમતો નીચે લાવવા સરકાર દ્વારા અગાઉ લેવામાં આવેલા પગલાંને વેગ મળવાની અપેક્ષા છે. મૂળભૂત આયાત જકાત એ એક મહત્વપૂર્ણ પરિબળ છે જે ખાદ્ય તેલની જમીની કિંમતને અસર કરે છે, જે બદલામાં સ્થાનિક ભાવોને અસર કરે છે. રિફાઈન્ડ સનફ્લાવર ઓઈલ અને રિફાઈન્ડ સોયાબીન ઓઈલ પરની આયાત ડ્યુટીમાં ઘટાડો કરવાથી ગ્રાહકોને ફાયદો થશે કારણ કે તેનાથી સ્થાનિક છૂટક કિંમતો નીચે લાવવામાં મદદ મળશે.
અગાઉ ઓક્ટોબર 2021માં રિફાઈન્ડ સોયાબીન ઓઈલ અને રિફાઈન્ડ સનફ્લાવર ઓઈલ પરની આયાત ડ્યુટી 32.5% થી ઘટાડીને 17.5% કરવામાં આવી હતી. આ એટલા માટે કરવામાં આવ્યું હતું કારણ કે વર્ષ 2021 દરમિયાન આંતરરાષ્ટ્રીય કિંમતો ખૂબ ઊંચી હતી જે સ્થાનિક કિંમતોમાં પણ પ્રતિબિંબિત થઈ રહી હતી.
દેશની જનતાને ખાદ્યસામગ્રી સરળતાથી મળી રહે તેવી વ્યવસ્થા સરકાર દ્વારા કરવામાં આવી રહી છે. એટલું જ ખાદ્યતેલની કિંમતમાં થયેલા વધારાને કાબુમાં લેવા માટે પગલા લેવામાં આવ્યાં છે. જેના પરિણામ સ્વરૂપે ખાદ્યતેલના ભાવમાં ઘટાડો થયો છે. એટલું જ નહીં હજુ પણ ખાદ્યતેલની કિંમતમાં ઘટાડો થાય તે દિશામાં કામગીરી કરવામાં આવી રહી છે.
