કચ્છના હરામી નાળામાં બીન વારસી પાક. બોટ મળી, માછીમારીનો સામાન મળ્યો

• હરામીનાળાના પિલ્લર 1161 પર બોટ દેખાતા BSFના જવાનો દોડી ગયા,
• પાકિસ્તાની માછીમારો ગાયબ થતાં પોલીસને જાણ કરાઈ,
• બોટમાંથી કોઈ વાંધાજનક વસ્તુઓ મળી નથી

ભૂજઃ કચ્છના હરામી નાળા ક્રિક વિસ્તારમાં અવાર-નવાર પાકિસ્તાની ઘૂંસણખોરો પકડાતા હોય છે. અને ડ્રગ્સની હેરાફેરી માટે પણ આ વિસ્તાર જાણીતો છે. ત્યારે આ વિસ્તારમાં બીએસએફનો સતત ચોકી પહેરો રહેશે. ત્યારે સંવેદનશીલ એવા અટપટા હરામીનાળા ક્રિક વિસ્તારમાંથી બિનવારસી પાકિસ્તાની બોટ મળી આવી છે. પિલર નંબર 1161 પાસેથી બીએસએફના જવાનોએ ઝડપેલી બોટમાંથી માછીમારીની સામગ્રી સિવાય વાંધાજનક ચીજવસ્તુ મળી ન હતી.

કચ્છના હરામીનાળાના પિલ્લર નંબર 1161 વિસ્તારમાં બોર્ડર સિક્યુરિટી ફોર્સ 59 બટાલિયનના જવાનો પેટ્રોલિંગ કરી રહ્યા હતા.ત્યારે ભારતીય સીમા વિસ્તારમાંથી બિનવારસી હાલતમાં પડેલી પાકિસ્તાની બોટ નજરે પડતા તેને ઝડપી પાડી હતી. વહેલી સવારે પેટ્રોલિંગ દરમિયાન ઝડપી પાડવામાં આવેલી આ બોટમાંથી તપાસ દરમિયાન માછીમારીના સામાન સિવાય અન્ય કોઈ વાંધાજનક વસ્તુઓ મળી ન હતી. ભારતીય સીમા વિસ્તારમાંથી મળેલી બિનવારસી સિંગલ એન્જિન વાળી લાકડાની બોટમાંથી 2 આઈસબોક્ષ, બે માછીમારીની જાળી, ઝરીકેન 6, મિલ્ક પાવડર, લોટ, ચોખા, ચા બનાવવા માટેના સાધનો સહિતની માછીમારને લગતો સામાન સિવાય અન્ય કોઈ વાંધાજનક વસ્તુઓ મળી ન હતી.

અત્રે ઉલ્લેખનીય છે કે,કચ્છના હરામીનાળાના અટપટા એવા કાદવ અને કીચડ વાળા આ વિસ્તારમાં હજુ થોડા દિવસો પૂર્વે જ પિલર નંબર 1136 વિસ્તારમાં પેટ્રોલિંગ કરી રહેલા બે જવાનો કાદવમાં ફસાઈ જવાથી વીરગતિ પામ્યા હતા.તેમજ થોડા સમય અગાઉ બીએસએફના અધિકારીઓએ પણ આ વિસ્તારની જાત મુલાકાત લીધી હતી.બે દિવસ પૂર્વે બિનવારસી હાલતમાં મળી આવેલી પાકિસ્તાની બોટ અંગે દયાપર પોલીસ મથકે બીએસએફ દ્વારા જાણવા જોગ નોંધ કરાવી હતી. પોલીસે પણ પાકિસ્તાની માછીમારો ક્યાં ગાયબ થઈ ગયા તેની શોધખોળ હાથ ધરી છે.