ભુજ વાયુસેના મથક: તાકિદની સ્થિતિને પહોંચી વળવા સજ્જતાની સમિક્ષા કરાઇ

• ભુજ વાયુસેનાની મુલાકાતે એર માર્શલ
• કમાન્ડિંગ-ઇન-ચીફ એર માર્શલ વિક્રમસિંહે લીધી મુલાકાત
• ખાસ ઉદેશ્યને ધ્યાનમાં રાખીને લીધી મુલાકાત

ભૂજ: પાકિસ્તાન દ્વારા ભારત વિરુદ્ધમાં કોઈ પ્રવૃતિ કરવામાં ન આવે અને પાકિસ્તાનની કોઈ પણ હરકતને તાત્કાલિક જવાબ આપવામાં આવે તે માટે નૌસેના અને એરફોર્સ હંમેશા તૈયાર રહે છે. આવામાં ભુજ વાયુસેના મથકની દક્ષિણ પશ્ચિમી એર કમાન્ડના એર ઓફિસર કમાન્ડિંગ-ઇન-ચીફ એર માર્શલે મુલાકાત લીધી હતી. ભુજ એરફોર્સ સ્ટેશન ખાતે તાકિદની સ્થિતિને પહોંચી વળવા માટે સજ્જતાની સમીક્ષા કરી હતી.

વાયુ યોદ્ધાઓ અને સ્ટેશનના અન્ય સંરક્ષણ સુરક્ષા કર્મીઓ સાથે સંવાદ પણ કર્યો હતો. સાથે સાથે કર્મીઓની નિપુણતા જાળવી રાખવા માટે સ્ટેશન દ્વારા રાખવામાં આવતા કેન્દ્રિત અભિગમની પ્રશંસા કરી હતી અને હવાઇ સલામતી સુનિશ્ચિત કરતી વખતે પરિચાલનની તૈયારીઓમાં વધારો કરવા માટે કર્મીઓ સંપૂર્ણ ખંત સાથે પોતાની ફરજ નિભાવે તે જરૂરિયાત પર વિશેષ ભાર મૂક્યો હતો.

ભૂજ એરફોર્સ સ્ટેશન પર એરમાર્શલના આગમન પર સ્ટેશનના વાયુ યોદ્ધાઓ દ્વારા ગાર્ડ ઓફ ઓનર રજૂ કરીને તેમનું સ્વાગત કરવામાં આવ્યું હતું. તેમણે બેઝ ખાસે વિવિધ સુવિધાઓની મુલાકાત લીધી હતી. તેમજ આ વિસ્તારમાં કોઇપણ આકસ્મિક ઘટનાનો સામનો કરવા માટે સ્ટેશનની પરિચાલન તૈયારીઓની સમીક્ષા કરી હતી.

દક્ષિણ પશ્ચિમી એર કમાન્ડના એર ઓફિસર કમાન્ડિંગ-ઇન-ચીફ એર માર્શલ વિક્રમસિંહે તા. 13 અને 14ના રોજ ભૂજ ખાતે આવેલા ફ્રન્ટલાઇન એરબેઝની મુલાકાત લીધી હતી. એરમાર્શલના સ્વાગતમાં ભૂજ એરફોર્સ સ્ટેશનના એર ઓફિસર કમાન્ડિંગ એર કોમોડોર મલુકસિંહ આવ્યા હતા.