ચારધામ યાત્રાએ જતા ભક્તો માટે મોટા સમાચાર,હવે દર્શન માટે 300 રૂપિયાની કાપલી કાપવી પડશે
- ચારધામ યાત્રાએ જતા ભક્તો માટે મોટા સમાચાર
- ચારધામ યાત્રા આગામી 22 એપ્રિલથી થશે શરુ
- હવે દર્શન માટે 300 રૂપિયાની કાપલી કાપવી પડશે
- નવી સ્લિપ સિસ્ટમ મંદિરના દરવાજા ખોલવાની સાથે શરૂ થશે
દહેરાદુન : જો તમે પણ આ વખતે ચારધામની મુલાકાત લેવાનું વિચારી રહ્યા છો તો આ સમાચાર તમારા માટે ખૂબ જ મહત્વપૂર્ણ છે. વાસ્તવમાં, સોમવારે બદ્રીનાથ-કેદારનાથ કમિટી (BKTC)ની બોર્ડ મીટિંગમાં નિર્ણય લેવામાં આવ્યો છે કે આ વખતે શ્રદ્ધાળુઓએ વિશેષ દર્શન માટે 300 રૂપિયાની ફી ચૂકવવી પડશે.
આ પ્રથમ વખત છે જ્યારે દર્શન માટે કોઈ ફી ચૂકવવી પડશે. અગાઉ કોઈ ફી લેવામાં આવતી ન હતી. આ નવી સ્લિપ સિસ્ટમ મંદિરના દરવાજા ખોલવાની સાથે શરૂ થશે.
આ વખતે કેદારનાથ અને બદ્રીનાથ ખાતે માત્ર BKTCના કર્મચારીઓ જ પ્રોટોકોલની વ્યવસ્થા જોશે. તે જ સમયે, દાન અને પ્રસાદમાંથી જે રકમ એકત્રિત કરવામાં આવશે તેની ગણતરી માટે વિશેષ વ્યવસ્થા કરવામાં આવી છે.
તેની સાથે આ વખતે કેદારનાથ મંદિરમાં 100 કિલોગ્રામનું અષ્ટધાતુ ત્રિશૂળ સ્થાપિત કરવામાં આવશે. આ સાથે, નાણાકીય વર્ષ 2023-24 માટે બેઠકમાં 76.26 કરોડનું બજેટ પસાર કરવામાં આવ્યું છે, જેમાંથી બદ્રીનાથ મંદિર માટે 39.90 કરોડ અને કેદારનાથ માટે લગભગ 36.35 કરોડની જોગવાઈ કરવામાં આવી છે.
ઉલ્લેખનીય છે કે,ચારધામ યાત્રા આગામી 22 એપ્રિલથી શરુ થવા જઈ રહી છે.બદ્રીનાથના દરવાજા 27 એપ્રિલે અને કેદારનાથ ધામના દરવાજા 25 એપ્રિલે ખુલશે, જ્યારે પરંપરા મુજબ અક્ષય તૃતીયાના દિવસે 22 એપ્રિલે ગંગોત્રી અને યમુનોત્રી ધામના દરવાજા ખુલશે.
