બિહારઃ વિદ્યાર્થીઓ વાહનોની હેડલાઈટના પ્રકાશમાં પરીક્ષા આપવા બન્યા મજબુર

બિહાર બોર્ડની ઈન્ટર પરીક્ષાનો પ્રારંભ થયો છે. પરીક્ષાના બે દિવસ પણ થયા ન હતા કે શિક્ષણ વિભાગની બેદરકારી સામે આવી છે. પ્રથમ દિવસે જ પરીક્ષા યોગ્ય રીતે યોજી શકી નથી. ઇન્ટરમીડિયેટની વાર્ષિક પરીક્ષામાં મોટી બેદરકારીનો કિસ્સો સામે આવ્યો છે. કિશોર કોલેજ મોતિહારી પરીક્ષા કેન્દ્રમાં બાળકોએ રાત્રે 8 વાગ્યા સુધી પરીક્ષા આપી હતી. એટલું જ નહીં, તંત્રની વ્યવસ્થા એટલી જબરદસ્ત હતી કે પરીક્ષા કેન્દ્રમાં વાહનોની હેડલાઈટ અને ભાડેથી જનરેટર લાવીને અજવાળુ કરવું પડ્યું હતું.

મહારાજા હરેન્દ્ર કિશોર કોલેજ મોતીહારી પરીક્ષા કેન્દ્રમાં બીજી શિફ્ટની પરીક્ષામાં સાંજે સાડા ચાર વાગ્યા સુધી પરીક્ષાર્થીઓને ઉત્તરવહીઓ આપવામાં આવી ન હતી. બીજી પાળીમાં હિન્દીની પરીક્ષા હતી. સમય વીતતો જોઈને પરીક્ષાર્થીઓએ પરીક્ષા કેન્દ્ર પર હોબાળો મચાવ્યો હતો. પરીક્ષાર્થીઓના ગુસ્સાનો અંદાજ એ વાત પરથી લગાવી શકાય છે કે મોતીહારી સદર એસડીઓ, ડીએસપી સહિત ત્રણ પોલીસ સ્ટેશનની પોલીસ ઘટના સ્થળે પહોંચી ગઈ હતી અને ભારે જહેમત બાદ પરિસ્થિતિ પોલીસના કાબૂમાં આવી હતી. જે બાદ સાંજે 4:30 વાગ્યા બાદ વિદ્યાર્થીઓને ઉત્તરવહી આપવામાં આવી હતી અને વિદ્યાર્થીઓએ વાહનો અને જનરેટરની હેડલાઈટમાં 8 વાગ્યા સુધી હિન્દીનું પેપર આપ્યું હતું. જ્યારે બીજી પાળીની પરીક્ષા સાંજે 5 વાગ્યા સુધીમાં પૂરી થવાની હતી.

બિહાર સ્કૂલ એક્ઝામિનેશન બોર્ડની 12મા ધોરણની પરીક્ષા શરૂ થઈ ગઈ છે અને બોર્ડ બે શિફ્ટમાં પરીક્ષાનું આયોજન કરી રહ્યું છે. તમામ પરીક્ષાઓ બે પાળીમાં લેવામાં આવશે. પ્રથમ શિફ્ટ સવારે 9:30 થી 12:45 સુધી અને બીજી શિફ્ટ બપોરે 1:45 થી 5 વાગ્યા સુધી હાથ ધરવામાં આવશે. તંત્રની બેદરકારી અંગે બાળકો અને વાલીઓમાં ભારે રોષ જોવા મળી રહ્યો છે.