નવી દિલ્હીઃ 1990માં ઘાટીમાં કાશ્મીરી પંડિતોની હત્યા કરનાર ફારૂક અહેમદ ડાર ઉર્ફે બિટ્ટા કરાટેના ગુનાની ફાઇલ ફરીથી ખોલવામાં આવી છે. આતંકવાદી બિટ્ટા કરાટેએ એક ઈન્ટરવ્યુમાં કહ્યું હતું કે તેણે 20થી વધુ કાશ્મીરી પંડિતોની હત્યા કરી છે. આતંકવાદી બિટ્ટા કરાટેએ પહેલા સતીશ ટીક્કુની હત્યા કરી હતી. સતીશ ટીક્કુ તેનો મિત્ર હતો, પરંતુ પાકિસ્તાન તરફી લોકોના સંપર્કમાં આવ્યા બાદ તેણે તો ત્યાં સુધી કહ્યું હતું કે તે કાશ્મીરની આઝાદી માટે તેની માતા અને ભાઈનું ગળું કાપી નાખશે. હવે સતીશ ટીક્કુના પરિવારે કોર્ટમાં અરજી દાખલ કરી છે.
તાજેતરમાં વિવેક રંજન અગ્નિહોત્રીની ફિલ્મ ધ કાશ્મીર ફાઇલ્સે આખા દેશને હચમચાવી નાખ્યો હતો. જે પણ સિનેમાઘરોમાંથી બહાર આવ્યા તેમના ચહેરા પર આંસુ અને ગુસ્સો હતો. આ ફિલ્મ પછી આખા દેશમાં કાશ્મીરી પંડિતો માટે ન્યાયનો અવાજ બુલંદ થયો હતો. બિટ્ટાનું સાચું નામ ફારૂક અહેમદ ડાર છે. તેના પર 31 વર્ષ પહેલા સતીશ ટિક્કુની હત્યા કરવાનો અને પછી ઘણા કાશ્મીરી પંડિતોની હત્યા કરવાનો આરોપ છે. તેણે ટીવી પર હત્યાઓની પણ કબૂલાત કરી હતી. બિટ્ટા કરાટે 1987-1988 દરમિયાન એલઓસી પાર કરીને પાકિસ્તાનમાં પ્રવેશ કર્યો હતો. બિટ્ટા કરાટેએ પાકિસ્તાન આર્મીમાંથી ટ્રેનિંગ લીધી અને પોસ્ટર બોય તરીકે ભારત પાછો આવ્યો. આ તે સમય હતો જ્યારે પાકિસ્તાને કાશ્મીરમાં અશાંતિ ફેલાવવા માટે અહીંના યુવાનોને ગેરમાર્ગે દોરવાનું શરૂ કર્યું હતું. કાશ્મીરની આઝાદીના નામે આ યુવાનોને હથિયારો સોંપવામાં આવ્યા હતા. કહેવાય છે કે કાશ્મીરી યુવકોની આ પહેલી બેચ હતી જે બિટ્ટાની સાથે પાકિસ્તાન જઈને ટ્રેનિંગ લીધી હતી.
બિટ્ટા કરાટે એટલે કે ફારૂક અહેમદ ડાર એ વ્યક્તિ છે જે ‘કાશ્મીરી પંડિતોના હત્યારા’ તરીકે જાણીતો છે.. બાદમાં બિટ્ટાએ રાજનીતિનો માર્ગ અપનાવ્યો અને શાંતિની વાત શરૂ કરી હતી. કાશ્મીર ખીણમાં શસ્ત્રો ઉપાડનારાઓની પ્રારંભિક યાદીમાં બિટ્ટાનું નામ ટોચ ઉપર છે. બિટ્ટા કરાટેએ જમ્મુ કાશ્મીર લિબરેશન ફ્રન્ટ (JKLF) નો સભ્ય બન્યા પછી કાશ્મીરી પંડિતોનું લોહી વહાવ્યું હતું. 1990માં જ્યારે ખીણમાંથી હિજરત શરૂ થઈ ત્યારે બિટ્ટાનો ડર તેની પાછળનું મુખ્ય કારણ હતું. તેણે કેમેરા સામે કબૂલાત કરી કે તેણે કાશ્મીરી પંડિતોની કેવી રીતે હત્યા કરી હતી અને તેને આવું કરવા માટે ટોચના કમાન્ડરો પાસેથી આદેશો મળ્યા હતા.
બિટ્ટાએ પહેલા તેના મિત્ર અને યુવા વેપારી સતીશ કુમાર ટીક્કુની હત્યા કરી હતી. ટીક્કુને તેના ઘરની સામે ગોળી મારીને મારી નાખવામાં આવ્યો હતો. ઘણા મીડિયા રિપોર્ટ્સમાં કહેવામાં આવ્યું છે કે બિટ્ટા શ્રીનગરની ગલીઓમાં ફરતો હતો અને જોતા જ પિસ્તોલ કાઢીને કાશ્મીરી હિન્દુઓની હત્યા કરતો હતો. 1991ના એક ટીવી ઈન્ટરવ્યુમાં તેણે ’20થી વધુ કાશ્મીરી હિંદુઓની હત્યા’ કરવાની કબૂલાત કરી હતી.
કાશ્મીરી પંડિતોની ખીણમાંથી હિજરત બાદ 22 જાન્યુઆરી 1990ના રોજ, બોર્ડર સિક્યુરિટી ફોર્સના જવાનોએ ફારુક અહમદ ડારને શ્રીનગરમાંથી ધરપકડ કરી હતી. તે સમયે તેની સામે 20 કેસ ચાલ્યા હતા. બિટ્ટા 16 વર્ષ જેલના સળિયા પાછળ રહ્યો હતો અને 2006માં તેને ટાડા કોર્ટમાંથી જામીન મળ્યા હતા. બિટ્ટાને મુક્ત કરતી વખતે, કોર્ટે અવલોકન કર્યું હતું કે ફરિયાદ પક્ષ પૂરતા પુરાવા રજૂ કરવામાં નિષ્ફળ રહ્યું હતું. જેલમાંથી છૂટ્યા બાદ બિટ્ટા જમ્મુ અને કાશ્મીર લિબરેશન ફ્રન્ટમાં જોડાયા હતા. આ પછી NIA દ્વારા વર્ષ 2019માં પણ બિટ્ટાની ધરપકડ કરવામાં આવી હતી. આતંકવાદી ભંડોળના આરોપમાં ધરપકડ કરવામાં આવી હતી. આ પછી, કેન્દ્ર સરકારે JKLF એટલે કે જમ્મુ-કાશ્મીર લિબરેશન ફ્રન્ટ પર પ્રતિબંધ મૂક્યો.
