ભાજપના રાષ્ટ્રીય અધ્યક્ષ જેપી નડ્ડા આજે ‘કમલ મિત્ર’ કાર્યક્રમનું ઉદ્ઘાટન કરશે

•  આજે ‘કમલ મિત્ર’ કાર્યક્રમનું ઉદ્ઘાટન 
• ભાજપના રાષ્ટ્રીય અધ્યક્ષ જેપી નડ્ડા કરશે ઉદ્ઘાટન 

દિલ્હી : વર્ષ 2024માં યોજાનારી લોકસભાની ચૂંટણીની તૈયારી કરી રહેલા ભાજપે અડધી વસ્તી એટલે કે મહિલા મતદારોને રીઝવવા માટે ખાસ પ્લાન બનાવ્યો છે. પાર્ટી દેશની દરેક લોકસભા સીટ પર 200 મહિલાઓને ‘કમલ મિત્ર’ બનાવવાની તૈયારી કરી રહી છે. ભાજપ મહિલા મોરચાના પદાધિકારીઓ અને કાર્યકરોને તાલીમ આપીને દેશભરમાં એક લાખથી વધુ ‘કમલ મિત્ર’ મહિલાઓને તૈયાર કરવાની યોજના ધરાવે છે. બીજેપીના રાષ્ટ્રીય અધ્યક્ષ જેપી નડ્ડા શુક્રવારે પાર્ટી હેડક્વાર્ટર ખાતે પાર્ટીના મહિલા મોરચાના રાષ્ટ્રીય અધ્યક્ષ વાનાતી શ્રીનિવાસનના નેતૃત્વમાં આ ‘કમલ મિત્ર’ તાલીમ કાર્યક્રમનું ઉદ્ઘાટન કરશે.

કમલ મિત્ર એક અનોખો તાલીમ કાર્યક્રમ છે જેના દ્વારા ભાજપ તેના મહિલા નેતાઓ અને કાર્યકરોને નરેન્દ્ર મોદી સરકાર દ્વારા અમલમાં મુકવામાં આવેલી યોજનાઓ વિશે તાલીમ આપશે. આ માટે, ઉજ્જવલા યોજના, સુકન્યા સમૃદ્ધિ યોજના, પ્રધાન મંત્રી આવાસ યોજના અને માતૃત્વ વંદના યોજના જેવી 15 મુખ્ય યોજનાઓ સંબંધિત માહિતી હિન્દી, અંગ્રેજી સિવાય તમિલ, તેલુગુ, મલયાલમ, કન્નડ, બાંગ્લા,ગુજરાતી અને મરાઠી સહિત અન્ય ઘણી ભારતીય ભાષાઓમાં તૈયાર કરવામાં આવી છે.

નડ્ડાએ 19 મેના રોજ તેને લોન્ચ કર્યા પછી, ભાજપ દેશભરમાં ડિસેમ્બર સુધી આ તાલીમ કાર્યક્રમ દ્વારા તાલીમ આપશે, જે ઓનલાઈન હશે.ભાજપ મહિલા મોરચાએ ડોક્ટરો, પ્રોફેસરો, એન્જિનિયરો, વકીલો, આઈટી પ્રોફેશનલ્સ અને સંશોધન વિદ્વાનો સહિતની પ્રતિષ્ઠિત મહિલાઓની પસંદગી કરી છે. આમાં સામેલ, એક ટીમ બનાવવામાં આવી છે જે મહિલાઓને તાલીમ આપશે અને તૈયાર કરશે.