EDની રાહ જોવાના નિવેદન પર રાહુલને ભાજપે આપ્યો જવાબ, કહ્યું તેઓ જણાવે કે કયા અધિકારીએ ફોન કર્યો
રાહુલ ગાંધીએ તેમની સામે EDની કાર્યવાહી કરવામાં આવશે તેવુ નિવેદન અપાયા બાદ ભાજપે પણ વળતો જવાબ આપ્યો છે ભાજપે કહ્યું છે કે રાહુલ ગાંધી ભ્રમ ફેલાવે છે તેઓ જણાવે કે કયા અધિકારીએ તેમને કોલ કર્યો હતો. રાહુલ ગાંધીએ એક પોસ્ટમાં દાવો કર્યો હતો કે સરકાર તેમની સામે EDના દરોડા પાડવાની તૈયારી કરી રહી છે. ભાજપે તેને વાયનાડ ઘટના પરથી ધ્યાન હટાવવાનો પ્રયાસ ગણાવ્યો છે.
શુક્રવારે રાહુલ ગાંધીએ સોશિયલ મીડિયા પર એક પોસ્ટ દ્વારા મોટો રાજકીય ખળભળાટ મચાવ્યો હતો.
કેરળના વાયનાડની ઘટના બાદ ત્યાં પહોંચેલા રાહુલ ગાંધીએ બપોરે 1.52 વાગ્યે પોસ્ટમાં લખ્યું – “સ્પષ્ટપણે, ટુ ઇન વનને મારું ચક્રવ્યુહ ભાષણ પસંદ ન આવ્યું. EDના સૂત્રોએ મને જણાવ્યું છે કે દરોડા પાડવાની તૈયારી કરવામાં આવી રહી છે. હું ખુલ્લા હાથે EDની રાહ જોઈ રહ્યો છું. મારા તરફથી ચા અને બિસ્કિટ.
કોંગ્રેસના સાંસદ પ્રમોદ તિવારીએ કહ્યું કે, પહેલીવાર એવું જોવા મળી રહ્યું છે કે એક બહાદુર યુવક દેશના ખેડૂતો, મજૂરો અને યુવાનોની સમસ્યાઓને ઉઠાવી રહ્યો છે. બેરોજગારી અને મોંઘવારી સામે બોલે છે. જે ચક્રવ્યુહ સર્જાયું છે તે તૂટી જશે અને બહાર આવશે. શું તમે તેનાથી ડરશો, તો શું તમે EDના દરોડા પાડશો?
રાહુલ ગાંધીએ એ નથી જણાવ્યું કે તેઓ કયા કેસની વાત કરી રહ્યા છે. તે પણ સ્પષ્ટ નથી કે આ વાત તેમણે પહેલેથી જ ચાલુ કેસને લઇને કહી કે નવા કેસને લઇને ? રાહુલ ગાંધીને નેશનલ હેરાલ્ડ કેસમાં જામીન પર છે. કોંગ્રેસના સાંસદો મણિકમ ટાગોર અને ગૌરવ ગોગોઈએ લોકસભામાં આ મુદ્દા પર તાત્કાલિક ચર્ચાની માગણી સાથે સ્થગિત પ્રસ્તાવની નોટિસ આપી હતી, જેને લોકસભા અધ્યક્ષે સ્વીકારી ન હતી.
ભાજપની જૂની આદતો બદલાઈ નથીઃમણિકમ ટાગોર
સાંસદ મણિકમ ટાગોરે કહ્યું, “આપણે બધા જાણીએ છીએ કે 10 વર્ષથી મોદી સરકાર અને અમિત શાહજી સતત ED, CBI અને ITનો ઉપયોગ કરી રહ્યા છે. તેઓ વિપક્ષી નેતાઓ સામે તુચ્છ કેસ કરે છે. આ વખતે લોકોએ મોદી અને અમિત શાહને તેમની જગ્યા બતાવી. તેમને 330 થી 240 પર લાવ્યા. તેઓ જેડીયુ અને ટીડીપી સાથે ગઠબંધન કરીને સરકાર બનાવવામાં સફળ રહ્યા હતા. સરકાર સહયોગીઓના ટેકાથી ચાલી રહી છે, પરંતુ તેમની જૂની આદતો બદલાઈ નથી.
કેન્દ્રીય મંત્રી ગિરિરાજ સિંહે કહ્યું કે, “દેશ માટે દુર્ભાગ્યપૂર્ણ છે કે રાહુલ ગાંધી બંધારણીય પદ પર વિપક્ષના નેતા છે, ગૃહ ચાલી રહ્યું છે, તેઓ માત્ર ગૃહની અંદર ખોટું બોલતા નથી પરંતુ ગૃહની બહાર પણ ભ્રમ ફેલાવવાનું કામ કર્યું છે.” હું તેને ચેલેન્જ કરું છું કે તે જણાવે કે તેને કયા અધિકારીએ ફોન કર્યો છે. તેઓ શરમ અનુભવે છે, વિશ્વને તેમની જાતિ વિશે પૂછે છે, અને તેમની જાતિ કહેવાથી ભાગી રહ્યા છે. તેમનાથી મોટો જૂઠો ક્યારેય થયો નથી.
